Hêrişî her wextan ra hêna zêde yê. Înkar her wextan ra hêna zêde yo. Hela îmha, her wextan ra hêna zêde yeno waştene. Awanbîyayîşê Dewleta Tirkî ra heta nika nê hîrê çiyî sey esas ameyî qebûlkerdene. Bê nê çiyan sewbîna yew polîtîka hetê dewlete ra qet û qet nêkewta felîyet. Kurdî bi serran o ke vera nê çiyan de mîyanê têkoşînêko pîl de yî. Kenî ke nê polîtîkayê lêşinî biqedîyê û ê zî sey heme hemwelatîyan, cuya xo bi nasnameyê xo bidomînî. Labelê no waştişê Kurdan her tim politikayanê înkar û îmha ser o raştê hêrişan yeno. Hêrişê ke yenî kerdene qij nîyê, vera qijî tewir tewir pîl ê. Sere de qetlîam û talan, hema her çi hetê dewlete ra Kurdan rê seke ferz o ameyî vînayene.
Têkoşînê Kurdan ke nika 40 serran ra zêde yo ke dewam keno; gelek hetan de gelek serkewtişanê cîyayan dî û nika zî peyê serkewtişanê neweyan o. Seba ke nê serkewtişan bivîno lazim o astengîyê ke Dewleta Tirkî vejena Kurdan ver o, biqedîyê. Kurdî nika şiknayîşê ê astengîyan ser o têwgêrenî. Aye ra sere de wazenî tecrîdo ke Rayverê înan Abdullah Ocalanî ser de yo bişikyo. Seba şikîyayîşê tecrîdî 124 rojî yo ke Leyla Guvene, 109 rojî yo ke Nasir Yagiz û 80 rojan ra zêde yo ke zindanan de û cîya cîya welatan de çalakîya grevê vêşanîye virazîyena. Na çalakî heme kesan de nîqaşê wijdanî akena û ma heme nika wijdanê xo de nîqaş kenî. Seba ke vengê çalakvanan bireso her ca û sere de şarê Kurdî dima ra zî heme hetê ke paştî danî Kurdan teber de zî çalaki yenî viraştene.
Parlamentera HDPî ya Amedî Dersîm Dag û çend welatperwerî, kewtibî çalakîya grevê vêşanîye. Kesê ke Dersîm Dag de pîya grev da bî, polîsî înan kerdî binê lepî û çend rojan ra dima serbest ameyê veradayene. Kesê ke veradîyayê û parlamenterê HDPî yê Wanî Tayîp Temel û Murat Sarisaç, bi beyanatêk dest pê grevê vêşanîye kerdî. Labelê dewlete xoverdayîşê Kurdan kamcîn tewir bibo wa bibo eynî tewir nêzdîyê Kurdan beno. Her çendêk parlamenter çalakî de bî zî polîsê dewlete eştî binaya HDPî ya Amedî ser o û bi tewrêko kovane hêrişê parlamenteran û kesê ke grevê vêşanîye de bî kerdî. Dîmenan de kovîtîya înan bi heme zelalîya xo yena vînayene. Tena nê hêrişî ra merdim fam keno ke dewlete xo nika resnaya sewîyeyêka bitemamî dişmentî û do bi heme çiyan hêrişanê Kurdan bikera. Her çendêk hêrişê dewlete bibî zî do Kurdî fek têkoşînê xo ra veranêdî.
Ewro her rojan ra hêna zede acizîya Kurdan esta; tecrîd hema zî dewam keno, hetêk de şer heto bîn grevê vêşanîye û peynî de weçînayîş esto. Acizîya Kurdan do xo biresno çiyêko bîn. Her çiyan ra ver do xo biresno xoverdayîşêko newe… Çunkî Kurdan de bê xoverdayîş rayîrêk çin bi û nika zî çin o. Xoverdayîş estbîyayîşê Kurdan o û aye ra eke kesê ke biwazî bibî vengê zindanan, ê Leyla Guvene û kesanê binan ke greve de yî, gere her çiyan ra ver xoverdayîşo demo nikayîn ser o bifikirîyê. Rayîrêk tena esto; xoverdayîş!
