Asayîşa Kelarê bi rêya telefonê gef li endezyar Herêm Mehmud ku ev 18 roj e li dijî tecrîdê di greva birçîbûnê de ye xwar
Endezyar Herêm Mehmud li navçeya Kelar a ser bi îdareya Germiyanê li dijî tecrîda li ser Rêberê Gelê Kurd Abdullah Ocalan ketiye greva birçîbûnê ya bêdem û bêdorveger. Çalakiya Herêm di roja 18’an de dewam dike. Asayîşa Kelar bi rêya telefonê ji Herêm Mehmud re got ku divê ew serdana asayîşê bike û ger neyê dê bibe encamên ne baş.
Li ser vê yekê Herêm Mehmud ji RojNews re axivî û wiha got: “Îro danê sibê asayîşa Kelarê telefonê min kir û ji min re gotin serdana asayîşê bike. Min jî ji wan re got ku ez nikarim bê nivîsa fermî werim asayîşê. Ji min re gotin tu niha li ku derê yî? Min jî got ez li mal im û ger tiştek pêwîst be bi telefonê ji min re bêjin.”
Herêm da zanîn ku asayîşê bi zimanek nexweş gef li wî xwariye û gotiye ger tu neyê dê piştre encam baş nebe û ev tişt anî ziman: “Min ji wan re got ku hûn bi kêfa xwe ne lê ez bê nivîsa fermî nayêm asayîşê. Bersiva wan ew bû, ji min re gotin ‘Wê piştre encamên ne baş derkevin holê’.” KELAR
