Sedat Akino ke gama Zîndanê Tîpê Tyî yê Erzinganî de tepişte bi grevê vêşanîye de bi û roja 44ine ya çalakîya xo de amebi tehlîyekerdene, çalakîya xo keyeyê xo de domneno
Grevê vêşanîye yê seba wedaritişê tecrîdê serê Rayberê Şarê Kurdî Abdullah Ocalanî ke hetê hemsereka Kongreya Cimatê Demokratîkî (KCD) û parlamentera Partîya Şaran a Demokratîke (HDP) ra amebi destpêkerdene kewt roja xo ya 126ine û grevê vêşanîye yo ke 337 tepişteyî kewtê ci zî dewam keno. Sedat Akino ke Zîndanê Tîpê Tyî yê Erzinganî de çalakîye de bi roja 44ine ya grevê vêşanîye de amebi tehlîyekerdene. Akino ke dimayo ke amebi tehlîyekerdene zî xoverdayîşê xo yê grevê vêşanîye domnabi çalakîya ci kewte roja xo ya 66ine.
Akin serê sibayî saet 09.00î de dest bi roje keno, bi mabênanê saetêk çîyanê awîyan şimeno. Refakatkarê ke dormeyê Akinî de yê, gama ke o şimitişê awîyan de zehmetî bianco dergîya nê mabênî kenê di saetî ra reyêk. Akin biroj bultenanê xeberan şopneno. Derheqê prosesê pêroyîyî de, tecrîd û grevanê vêşanîye de munaqeşeyan keno. Refakatkarî anê ziwan ke moral û motîvasyonê ê tim ca de yo, labelê rey-rey problemê weşîye yê Akinî yê sey krampê madeyî, dejê sereyî û berzbîyayîşê adirî xo ramojnenê. Heman wextî de înan ard ziwan ke çimo rast ê Akinî hêdî hêdî vînayîya xo keno kemî.
Sebebo tekane yê çalakîya ma tecrîd o
Akinî derheqê çira çalakîya xo de qerardar o qisey kerd û nê va: “Sebebo bingeyên ê kewtişê ma yê grevanê vêşanîye tecrîdê serê Rayberê Şarê Kurdî Abdullah Ocalanî yo ke ma wazenê no tecrîd biqedîyo. Çalakîya ma bi nê hawayî yena manaya waştişê wedaritişê tecrîdê serê şaranê Tirkîya û Kurdistanî. A yewe ra ma bedenê xo da vêşanîye ver. Sebebo tekane yê çalakîya ma tecrîd o. Wa çew nêanco sewbîna cayan ser. Seba ke ma cuya xo ra bacîyayê ma çalakîyêka wina nêkerda. Heta ke tecrîd nêro wedaritene qetî do na çalakî nêqedîyo.”
Ez embazanê x ora moral gêna
Akinî derheqê Leyla Guvene û çalakwananê bînan ê ke sey ê kewtê grevê vêşanîye zî qisey kerd û va: “Xoverdayîşo ke înan da destpêkerdene zaf ercaye û pîroz o. Na çalakî tena seba şexsêk nêameya destpêkerdene. Na çalakîye ameyoxê Kurdistan û Tirkîya dir eleqedar a. Çalakîya ke ewro ameya destpêkerdene nîşanê serkewtişî ya. Bi hezaran ciwanî estê ke bedenê xo dayê verê vêşanîye. Ganî çew persa ‘Nê ciwanî çi wazenê?’ biperso. Waştişê çalakîyanê Ewropa, Vakûr, Başûr û zîndanan meşrû yê. Ez heme embazanê xoverdayoxan ra moral gêna. Grevê vêşanîye yo ke hetê embaze Leyla ra ame destpêkerdene her ke şino hîna beno pîl. Ez wazena heme hemrayan ra vajî ke serkewtiş nizd o, ma do bi ser bikewê û do faşîzm vîndî bikero.”
Serkewtiş nizdî yo
Akinî ard ziwan ke embazê êyê ke zîndanan de grevê vêşanîye de yê şertanê zehmetan de yê û peynîya qiseykerdişê xo de înan va: “Halê înan ûca rind nêyo. Ma axir teber ra yê. La ez wazena vajî ke ma wayîrê heman îrade û xoverdayîşî yê. Na yewe ra ez eşkena vajî ke vêşanîye ma ser o zaf tesîr nêkena. Şarê ma vengê ma bieşnawo ma rê bes o. Ma çalakîya xo de biqerar ê. Ma do heta peynî na çalakîye bidomnê û nê ra gumanê ma çinyo. Yew ganê ma esto, ma do ê zî nê rayîrî de bidê. Ewro êyê ke hukmat de yê beno ke nizdê nê prosesî nêbê labelê xeberdarê serkewtişî estareyê ke asîman de bereqênê yê. Çende şino ê estareyî hîna bereqênê. Çunke hemrayê ma hîna bicoş û bimoral tewrê na çalakîye benê. Na havile, moral, coşî û heyecanî hukmat hîna bixof kerdo. Naye ra ganî hukmat game pey de bierzo. Çunke ma tena şexsêk ra behs nêkenê, ma behsê rayberêkê sîyasîyî yo ke des mîlyonî kesan ê qebûl kerdo kenê. ÊLÎH
