Bi pȇşwazîkirina Newrozȇ re, pȇngava “Bi berxwedanȇ em ȇ tecrîdȇ bişkînin, faşîzmȇ tȇk bibin“ derbasî qonaxeke nû dibe. Ji niha ve diyar e ku Newroza 2019 an, ne mîna hemû Newrozan e. Pȇvajoya ku rȇzdar Leyla Guven da destpȇkirin, li her derȇ belav bû, her wiha 4 heyv li paş xwe hiştin û ket heyva pêncemîn. Tevî hemû astengî û zehmetiyȇn li der û hundirȇ welat, di serî de li zindanȇn dagirkeran, bi hezara dîlȇn azadiyȇ dest bi çalakiyan kirin. Berxwedan û banga rȇzdar Leyla Guven, li hemû navendȇn welat û li derveyî welat, di qada navneteweyî de deng veda.
Jina kurd a pêşeng, bi diruşma bi van gotinan rexnedayîna xwe da; …ji ber ku me heya niha Rȇberȇ xwe azad nekir, em lȇborîna xwe ji Rȇberȇ xwe dixwazin… Her wiha, ji wateya vȇ hevokȇ jî diyar e ku Leyla Guven ji çerx û dewrana bȇbext û sexte re got: Êdî bes e! Şeqama xwe li rûyȇ dagirkerî û bȇbextiyȇ daye.
Di sala 2014’an de, dewleta dagirker bi hemû derfet û hȇza êrîşî kurdan kir û komkujiyên hovane pêk anî. Hovîtiya ku hat kirin ne di tu yasayên navneweyî de hey û ne jî di tu ol û baweriyê de heye. Dewleteke endamê NATO’yê êrîşî gelekî dike û her cure qirkirin û talanê pêk tîne lê hêzên navneteweyî bêdeng in û bêdengî tê wateya pejirandina helwesta sosret.
Dema mijar bibe kurd hemû pîvanên wan di bin siya bazirganiyê de dimînin. Îca fêmkirin û têgihiştina van rastiyan ne derd e û ne jî merem e, tişta esil were lêpirsînkirin ew e ku hinek derdorên kurd xwe sipartine pergala dagirker. Derd û kula herî giran helwesta van kurdan e.
Pergal bi hemû şêwazan dijmantî û dijberiya gelê kurd dike û ji bilî qikirin û înkarê tu şêwaz û rêbazeke din nas nake. Ev dijminatî û polîtîkayên çend salên dawîn nîne û bi sedan sal in heman rengî êrîşî kurdan dikin û heman stratejiyê dimeşînin. Hemû dinya-alem, sazî û dezgehên cîhanê vê rastiyê dizanin û bi peymana Lozanê ev rastî pejirandin. Tenê haya çavên kor, wijdanên mijar, kurdên ku rûmet û heysiyeta xwe firotine ji vê pergalê nîn in.
Ev pergal hebûn û pêşeroja xwe tenê di qirkirin û înkara kurdan de dibîne. Hemû siyaseta xwe, bazirganî, şer, çetetî, dizî û talana xwe xistiye xizmeta stratejiya ku li ser bingehê dijberiya kurdan hatiye avakirin.
Dema dibêjin tecrîd pêwîst e mirov baş vê polîtîkayê binirxîne û li ser vê mijarê baş raweste. Êdî ji her demê baştir hatiye fêmkirin ku qeder û pêşeroja gelê me girêdaî pêşxistin û zexmkirina yekitiya neteweyî ye.
Di vê pêvajoya nazik û dîrokî de du mînakên ku pêşerojê misoger bikin derketin holê; ya yekemîn pêngava ku rêzdar Leyla Guven da destpêkirin û ya duyemîn jî serhildana gelê Şêladizê bû. Her wiha li bakurê Kurdistanê lihevkirina partiyên kurd mizgîniya Newrozê û serdema nû didin.
Dibe ku bedelên giran bên dayîn lêbelê raperîna ku Leyla Guven da destpêkirin dikare pêşî li êşên gelek giran bigire. Serhildan û raperîna gel û nemaze jî xwedîderketina gel a HDP’ê ya ji bo hilbijartinên 31’ê adarê dikare pêvajoyê veguhezîne û planên qirêj yên Erdogan/Bahçelî têk bibe.
Serkeftin a Leyla û hemû berxwedêrên vê serdemê ye. Newroza Leylayan û berxwêderan pîroz be!
