Sedat Akino ke Zindanê Tîpa Eyî yê Erzinganî de seba wedarnayîşê tecrîdê serê Rayberê PKKyî Abdullah Ocalanî grevê vêşanîye de bî, badê ke serbest ame veradayene zî keyeyê xo de çalakîya xo kewan keno
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 128. de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Badê Guvene zindananê Tirkîye de zî çalakîya grevê vêşanîye dest pêkerdî û 1ê Adare de zî vilayê pêroyê zindanan bî.
Nê hepsîyan ra yew zî Sedat Akinî yo. Akino ke Zindanê Tîpa Eyî yê Erzinganî de seba wedarnayîşê tecrîdê serê Rayberê PKKyî Abdullah Ocalanî kewt grevê vêşanîye û badê ke 19ê Sibate de serbest ame veradayene keyeyê xo de çalakîya xo kewan keno zî înan ra yew o. Ganî bêro vîrvistiş ke rewşa weşîya çalakgeran her ke şona xidar bena. Derheqê babete de çalakger Sedat Akinî qisey kerd.
Akinî dîyar kerd ke waştişê ci waştişêko şexsî nîyo û wina dewam kerd: “Seba azadîya no şarî, mi merg girewt çiman ver. Fikrê mi nêbedilîyeno. Eksê ci her ke şono qerarê mi xurt beno. Hetê weşî de ke çîyêk biqewimîyo ez do tedawî qedûl nêkera. Heta ke waştişê mi nêrî qebulkerdiş, ez ti hawa mudaxaleyêko tibbî qebul nêkena.”
Çîqas têkoşîn berz bibo, hende serkewtiş nizdîbeno
Akinî tewr peynî da zanayene ke bi telefonî Nasir Yagizî û Leyla Guvene reyde qisey kerdo û wina va: “Ma vînenî her ke şono çalakî vila beno. Tesilî heta ke tecrîd peynî nêbo çalakîya mi do dewam bikero. Tena Rayberê PKKyî Abdullah Ocalan nê pêroyê Tirkîye yeno tecrîdkerdiş. Seba ke rojê tarî şêrî, ma do têkoşîn bidî. Her roje merdim yenî tepiştiş û tewqîfkerdiş. Sebebê hêrişan oyo ke xutbîyayîşê têkoşînî ra tersenî. Ganî qerardarîya ma dewam bikera. Zindanan de bi hezaran hepsîyî grevê vêşanîye de yî. Ma do rojê tarîyan roşna bikerî. Ganî ma raşteyanê Newroze bi dekerî û mesaj bidî. Ma paweyê berzkerdişê vengan î. Çîqas têkoşîn berz bibo, hende serkewtiş nizdîbeno.” ÊLIH
