Yewîya Hêzê Şorişgeran ya Dêrsimî zext û qedexeyanê serê xebatanê înan yê weçînitişî bi kombîyayîşêko çapemenî şermizar kerde
Yewîya Hêzê Şorişgeran ya Dêrsimî Buroyê Weçînitişî yê Merkezê Dêrsimî de seba şermizarkerdişê zext û qedexeyanê serê xebatanê înan kombîyayîşêk viraşt. Parlamenterê HDPyî Kemal Bulbul, Namzedê Yewîya Hêzê Şorişgeran yê Dêrsimî Nurşat Yeşil, Hidir Demir, Endamê MYKyî yê EMEPî Levent Tuzel, Endamê MYKyî yê ESPî Sitki Gungor û xeylê kesê bînî kombîyayîş de hadre bî.
Do têkoşînê ma dewam bikero
Hemserekê HDP’yî yê Dêrsimî Hidir Çiçekî dîyar kerd keDêrsim de erzenî serê buroyan û wina va: “Pankart û afîşê Partîzan yenî arêdayîş. Embazê ma raştê provokasyon û hêrişan yenî. Şarê ma do cewabêko huqûqî bido înan. Seba cewabdayîşêko huqûqî do têkoşînê ma dewam bikero. Yewîya Hêzê Şorişgeran nê hêrişan ra nêtersena.”
Mudaxaleya prosesê weçînitişî kenî
Endamê MYKyî yê EMEPî Levent Tuzelî zî qiseykerdişê xo de wina va: “Ma binê zext û şîdetî de şonî weçînitişê 31ê Adare. Bi caardişanê neseyyewbînanî û hemverê huqûqî mudaxaleyê prosesê weçînitişî kenî. Yewîya Hêzê Şorişgeran û partîya ma hêrişan reyde rî bi rî yî. Şar do wayîrê îradeya xo bivejîyo. Zext nêeşkenî ma têk bibî.”
Kulturê Îbrahim Kaypakkaya yo
Parlamenterê HDPyî Kemal Bulbulî zî zextan şermizar kerd û va: “Partîzan eynî wext de kulturêko sîyasî yo. Kulturê Îbrahim Kaypakkaya yo. Mudaxaleya hemverê Partîzan eynî wext de mudaxaleya hemverê Îboyan û kulturê Dêrsimî ya.” DÊRSIM
