Seba hepsîyo sîyasî Zulkuf Gezenî ke hemverê tecrîdkerdişê Rayberê PKKyî Abdullah Ocalanî de Zindanê Tîpa Fyî yê Tekîrdagî de cuya xo peynî kerd, Keyeyê Tazîye yê Şaklatî yê qezaya Peyasî de serweşî yenî qebûlkerdene
Zulkuf Gezenî seba şermizarkerdişê tecrîdê serê Rayberê PKKyî Abdullah Ocalanî Zindanê Tîpa Fyî yê Tekîrdagî de şewa 16ê Adare de cuya xo peynî kerd. Badê ke keye malumat girewt seba teslîmgirewtişê cenaze şî Tekîrdag û berdî morgê Teyaregehê Ataturkî yê Stenbolî. Parlementerê HDPyî, datîzayê Gezen û xeylê kesî Teyaregehê Ataturkî de cenaze pêşwazî kerdî. Keyeyê Gezenî waşt ke ewro saet 09.50î de cenaze defin bikerî û bîyarî Amed. Labelê polîsan keye tehdît kerd û waşt ke cenaze şewe de defin bikerî. Seba ke keye talebê polîsan qebûl nêkerd, polîsan bê malumatê keye teyaregeh de dest ronayî cenaze ser û ardî Amed.
Polîsan bi nimite cenaze Teyaregehê Ataturkî bi teyareyê THYyî yê seferê TK2600î saet 00.20î de ardî Amed. Polîsan badê ke cenaze ardî Amed keyeyê Gezenî gêrayî û vatî: “Ma do cenaze defin bikerî. Eke şima biwazî eşkenî tewrê merasîmî bibî. Eke nêwazî zî tewrê ci mebenê.”
Polîsan bi zorî cenazeya Gezenî Goristanê Yenîkoyî de defin kerdî û destûr nêdayî ke parlementerên HDPyî Pero Dundar, Mûsa Farîsogûlari, Remziye Tosûn, Nûran Îmîr, Feleknas Ûca, Salîha Aydenîz û Ayşe Acar Başarane teerê merasîmê cenaze bibî.
Keyeyê Gezenî taxa Huzurevlerî de Keyeyê Şînî yê Şaklatî de serweşîyan qebûl keno. AMED
