Datê Zulkuf Gezenî yo ke seba wedarişê tecrîdî canê xo dayo, ard ziwan ke polîsan nêverdayo ke ê beşdarê nimajî bibê û duayan biwanê û va: “Goreyê zanayîşan o ke avûkatan hepisxaneyî ra girewto Zulkufî çalakîya fedayîye viraşta.”
Zulkuf Gezen o ke Zîndanê Tîpê Fyî yê Tekîrdagî de semedê protestokerdişê tecrîdê serê Rayberê Şarê Kurdî Abdullah Ocalanî grevê vêşanîye de bi û dimayê viraştişê çalakîye şehîd kewt û cenazaya ci morgê Rasteyê Teyareyan ê Ataturkî yê Stenbolî ra bê xebere keyeyê ci ameye berdene bi Amed, ardişê cenaza ra dima polîsan saet 00:20 xebere daye keyeyê ci û va: “Ma do cenaza emşo wedarê. Şima wazenê beşdarê ci bibê, eke nêwazenê zî şima zanê.”
Cenaza bi zor ameye definkerdene
Parlamenterê HDPyî yê ke keyeyê Gezenî reyde seba girewtişê cenaza şîyî rasteyê teyareyan, rasteyê teyareyan de bi seyan polîs û wesayitanê zirxinan dormeyê înan grewtê. Polîsan cenaza bi wesayîtanê rangeran û sîvîlan berde Goristanê Yenîkoyî. Polîsan teberê tayê ferdanê keyeyî de destûr nêda kesî ke beşdarê cenaza bibê, cenaza bi zor daye wedarnayene.
Îdîaya dozgerîye raşt nîya
Hetê bînî ra derheqê çalakîya Gezenî de hetê Serdozgerîya Komare ya Tekîrdagî eşkerayîye ame dayene û îdîa kerd ke têkilîya na çalakîye bi tecrîdê serê Ocalanî çin a.
Datê Zulkuf Gezenî ard ziwan ke eşkerayîya Serdozgerîya Komare ya Tekîrdagî rast nîya û wina dewam kerd: “Zulkufî waşt ke 1ê Adare de tewrê çalakîye bo, labelê seba ke hetê weşîya ra problemê xo bîyî hemrayanê ci destur nêda ci. Çalakwananê grevê vêşanîye rê refakat kerdêne. Goreyê zanayîşê ke avûkatan hepisxanayî ra girewtê, Zulkufî çalakîya fedayîye viraşta.”
Nimaj û dua ra zî tersayî!
Gezenî ard ziwan ke, keyeyî ci seba ke cenaza bigîro şîyî Rasteyê Teyareyan ê Amedî û va: “Rasteyê Teyareyan ra heta Goristanê Yenîkoyî ma abluqaya polîsan reyde şîyî. Parlamenterî nêgirewtî zere. Ma bi xo cenaza xo şute. Teyna ma çar kesî tewrê nimajê cenaza bîyî.”
Gezenî da zanayene ke nimajê cenaza ra dima polîsan destûr nêdayo ke ê duayan biwanê, seba ke cenaza ca de bêra wedarnayene polîsan bi înan zor kerdo û va: “Camîyî ra heta goristanî ambûlans nêame dayene. Ma ra ame vatêne ke mesaîyê ambûlansî qedîyayo. No konseptêk o. Hema cenazayanê winayan rê ney do bikerê. Tewr destûr nêda ci ke merdimê ci zî tewrê cenaza bibê.”
Polîsan vernîya ema ci zî girewt
Ame zanayne ke Ema Gezenî Behîye Bulute zî vizêrî seba tewrbîyayîşê cenaza şîya Goristanê Yenîkoyî, labelê polîsan ê ke dormeyê goristanî girewtbî destûr nêda ke Bulute tewrê definkerdişî biba. AMED
