Rojnameger û nûçegîhanê DÎHA’yê ya bi KHK’ê hat girtin Volkan Eryîgît û nûçegihanê rojnameya Evrenselê Hasan Îşler li ser gorên xwe hatin bibîranîn
Di adara 2004’an de dema rojnameger û nûçegîhanê DÎHA ya bi KHK’ê hat girtin Volkan Eryîgît û nûçegîhanê rojnameya Evrenselê Hasan Îşler karwana hilbijartinê ya ‘Yekitiya Hêza Demokratîk’ dişopand, li Edeneyê qeza derbaskiribûn û jiyana xwe ji dest dabûn. Rojnamegeran û Malbata Eryîgît û Îşler, li ser gorên wan ew bi bîr anîn.
Di bernameyê Eryîgît a li Goristana Kuçukoba de xebatkarên çapemeniyê, parlamenterê HDP’ê yê Edeneyê Kemal Pekoz, Rêveberên HDP’ê yên bajar û navçeyê, rêveberên MEYADER, TUAYDER û gelek welati amade bûn. Di merasîma bi bîr anînê de bavê Volkan Eryîgît Aydin Eryîgît, qala kurê xwe kir û diyar kir ku dê bibe şopdarê rêya kurê xwe.
Parlamenterê HDP’ê yê Edeneyê Kemal Pekoz jî bal kişand ser zextên li ser çapemeniya azad û wiha got: “Çapemeniya azad tevî hemû astengiyan erk û peywira xwe pêk tîne. Kesên jiyana xwe ji dest dane divê her roj bên bibîranîn.”
‘Divê têkoşîna wî bê pêşxistin’
Malbata Rojnameger Îşler jî li gel rojnameger û rêveberên EMEP’ê çûn gora Hasan Îşler a li Goristana Akkapiyê. Li ser gora Îşler endamê GYK’ê EMEP’ê Halîl Îmrek diyar kir ku Îşler nasnameya rewşenbirî û karkeriyê di bedenekê de gihandibû hev û anî ziman ku divê di her rojname, belavok û afîşê de bê bibîranîn û têkoşîna wî bê pêşxistin. EDENE
