Şervanên HSD’ê li gundê Baxozê 7 êzidî ji çeteyên DAIŞ’ê rizgar kirin. Ji kesên hatin rizgarkirin 5 jê jin û 2 jî zarokin
Şervanên Hêzên Sûriyeya Demokratîk (HSD) di çarçoveya Şerê Tunekirina Terorê de li bajarokê Baxozê yê Dêrazorê operasyona xwe ya li dijî çeteyên DAIŞ’ê didomînin. Duh jî şervanên HSD’ê 5 jê jin û 2 jî jê zarok, bi giştî 7 êzidî ji destê çeteyên DAIŞ’ê rizgar kirin.
Şervanên HSD’ê sivîlên ku rizgar kirin, derbasî herêmên bi ewle kirin. Ji fermandarên HSD’ê Aryen Cûdî bi zarokekî êzidî re li ser girê Baxozê sihbet kir û ev kêlî ketin ber kadrajên rojnamegeran.
Navên sivîlên hatine rizgarkirin wiha ne: “Pakîze Mehal Heso (30) a ji gundê Koço yê Şengalê, Xevla Îsmaîl Xwedêda (19) a ji gundê Koço, Emîne Xalo Îzir (44) a ji gundê Koço, Şamil Îsmaîl Xwedêda (15) ê ji gundê Koço, Solîn Suleyman (17) a ji gundê Koço, Xunav Xidir Adim (32) a ji gundê Koço û Aydîn Hedît Tala (12) ê ji gundê Hirdan ê Şengalê.” DÊRAZOR
