Amed de bi se hezaran kesî bi şîarê ‘Ma do miheqeq ser bikewê, tecrîdî bişiknê‘ Newroze pîroz kenê. Newroze de sloganê vera tecrîdî benê berz
Newroze Amedî ya ke hetê Partîya Demokratîke ya Şaran (HDP) ra ameye organîzekerdene, bi seyan kesî ardî têhet. Layla Guvena ke 134 rojî yo vera tecrîdî grevê vêşanîye de ya morê xo da Newroze rê.
Newroze bi qiseykerdişê serekê Komîteya Hadreyîye Garîp Kandemîrî dest pêkerd. Kandemîrî vat ke no rayraşîyayîş, rayraşîyayîşê azadîye yo û xoverdayoxê grevê vêşanîye silam kerdî.
Dima ra zî hemserê Pêroyê KCDyî Beran Ozturkî Newroze pîroz kerde, şexsê Leyla Guvene de xoverdayoxê grevê vêşanîye silam kerdî û va: “Heta ke Zukufî bibê, Dehaqî do vîndî bikerê. Bi ters û xof wazenê ke pêser game bi de ma eştene. La bi felsefeya Birêz Ocalanî do xover bidê û miheqeq ser bikewê.”
Ozturkî bale ante muhîmîya yewîya şarê Kurdî ser û va: “Eke ma bibîyêne yew ewro ne Birêz Ocalan binê tecrîd de bi, ne zî Kerkuk û Efrîn ameyêne îşxalkerdene. HDPyî partîyê Kurdî ardî têhet. No çîyêko tarîxî yo. Mazlûm Dogan ra heta Leyla Guvene, Zulkuf Gezenî no xoverdayîş do bireso serkewtiş. Ma ganî bibo vengê xoverdayoxan û serkewtiş dest bifînî. Bi na çalakîye do Birêz Ocalan azad bo. Ma do miheqeq ser bikewê, tecrîdî bişiknê.”
Bado zî namzedanê hemşaredarîye yê Bajarê Girdî yê Amedî şar silam kerd. Namzed Selçûk Mizrakli vat ke Newroz roşnayî ya, ayebîyayîş a, roja wekerdişê adirê azadîye ya. Mizrakliyî vatişê hemşaredara Amedî Gulten Kişanake ‘Umîdê ma ameyoxo azad de yo, ma Amed ê Amed ma yê’ vist vîrî û va ‘Ma mezopotamya yê, ma Amed ê. Ma do miheqeq ser bikewê.’
Namzede Hulya Alokmen Uyanike zî Newroze şarî pîroz kerde û şexsê Leyla Guvene, Nasir Yagizî de xoverdayoxê grevê vêşanîye silam kerdî.
Pîrozkerdiş bi qiseykerdişan dewam keno. AMED
