Hemsereka KCDyî Leyla Guvene peyamêk Newroza Amedî rê şawit û vat ke, “Hewra Zulkuf bi hemlaya xo ya xoverdayîşî ameyoxê ma kerd roşnî.”
Hemsereka KCDyî Leyla Guven a ke vera tecrîdî 134 rojî yo grevê vêşanîye de ya, peyamêk Newroza Amedî rê şawit. Verê peyamê Leyla Guvene bi eynî waştişan parlamenterê HDPyî Dêrsim Dag, Tayîp Temel û Mûrat Sarisaç yê ke 3ê Adare ra nata grevê vêşanîye de yê, bi se hezaran kesî silam kerdî
Parlementerî demêko derg dekewtişê protokolî de ameyî vindernayene û bado zî derbazê wareyê Newroze bîyî. Peyamê Leyla Guvene hetê parlamenterê HDPyî Dêrsim Dagî ra ame wendene.
Peyamê Leyla Guvene de nê ameyî vatene:
“Merheba Amed, merheba paytextê xoverdayîşî. Merheba dayîkê fedakarî û ciwanê qehremanî. Ez bi ruhê xoverdayîşê zîndanan viranê fîna şima hemeyan ro. Şarê ma yo hêca, Newroze destpêkerdişê wisarî ya, gandarbîyayîşê azadîye ya. Newroze qîrayîşê Mazlûmî ya, Sûranê Amedî de govenda Zekîye û şemala Ronahî û Rahşanan a. Newroze qehreman Zulkuf Gezen o. Seba naye zî nameyê Newroza 2019î hemra Zulkuf Gezen o. Hemrayî, Zulkuf Gezen şehîdê hemleya xoverdayîşî yo. Hemra Zulkuf bi hemleya xo ya xoverdayîşî ameyoxê ma kerd roşnî.
Ma do tecrîdî caran qebûl nêkerê
Şarê ma yo qehreman, serkewtiş zaf nêzdî yo. Wisar ame. Serra 2019î de ma do tecrîdî bişiknê û ma şarê xo azad bikerê. Ganî heme şarê dinya bizanê ke ma do cuyêka mîyanê tecrîdî caran qebûl nêkenê. Xoverdayîşê ma yo serra 2019î do bibo serra xoverdayîşî ya şarê Kurdî û Kurdistanî. Bi nê ruhê xoverdayîşî û bawerîye ez şima silam kena. Newroza şima pîroz bo. Ma do qetî ser bikewê.” AMED
