Nameya Ayten Beçet a bi armanca şermezarkirina tecrîda li ser Rêberê Gelê Kurd Abdullah Ocalan çalakiya canbexşane pêk anî û şehîd bû di Newroza Stenbolê de hat xwendin. Beçet di nameya ku li paş xwe hişt de wiha dibêje: “Ji bo pêngavekê bavêjim, yekem care xwe wiha azad hîs dikim.”
Di pîrozbahiya Newroza Stenbolê ya bi dirûşmeya “Teqez em ê bi ser bikevin, tecrîdê bişkînin” ku li Bakirkoyê bi tevlibûna bi sedhezaran hat lidarxistin de, nameya Ayten Beçet a bi armanca şermezarkirina tecrîda li ser Rêberê Gelê Kurd Abdullah Ocalan li Girtîgeha Sergirtî ya Jinan a Gebzeyê ya Kocaeliyê çalakiya canbexşane pêk anî û şehîd bû hat xwendin.
Nameya Ayten Beçet a ku li paş xwe hişt wiha ye: “Di rojên ez ketim nava lêgerîna ku çawan ji pêvajoyê re bibim bersiv de, Heval Zulkuf Gezen di 17’ê Adara 2019’an de, ji bo min nîşan da ku çi dibe bila bibe li ser bingeheke rast mirov dikare ji pêvajoyê re bibe bersiv, mirovekî ku dixwaze azad bibe, dikare azad bibe û ji bo şikandina tecrîdê jî tu tişt nikare bibe asteng. Bi soza ku min dabû Rêbertiyê ez beşdarî vê pêngavê bûm. Min di şexsê xwe de, gelê kurd, gelê Botan û metropolan hîn bihêztir û zanetir beşdarî vê pêngavê kir. Divê em xwe di şexsê Heval Zulkuf de pak bikin û ji bo şikandina tecrîdê hîn zêdetir dengê xwe bilind bikin. Ji bo pêngavekê bavêjim, yekem care xwe wiha azad hîs dikim. Ez di wê bariyê de me ku bi mejî û rihê xwe, bi coşa hevdîtina Rêbertiyê, bi jiyanek birûmet a fermandar Heval Zulkuf Gezen weke mîras ji me re hiştî, em ê çembera berxwedanê mezin bikin û bibin bersiv ji pêvajoyê re.
Bijî berxedana zindanan
Bimire komplo û tecrîda navneteweyî
Silav û Rêzên Şoreşger…
Ayten Beçet” STENBOL
