HDP’yî çarçewayê weçînayîşê 31ê Adare de Çewlîg de mîtîng organîze kerd û hemsereka HDPyî Pervîn Buldane mîtîng de qisey kerd. Buldane va: “31ê Adare seba Tirkîya, seba ma û seba şarê Çewlîgî tarîxêko muhîm o û 31ê Adare de do her çî bivurîyo.”
Mîtîngê HDPyî Cadeyê Gençî, çatrayîrê PTTyî de ame viraştene. Hemsereka HDPyî Pervîn Buldane, parlamentere HDPyî yê Çewlîgî Erdal Aydemîr, namzedê hemserekîya Şaredarîya Çewlîgî Senem Çakase û Hişyar Ozsoy, namzedê qezayanê Çewlîgî, îdarekarê rêxistinanê HDP û DBPyî yê qeza û merkezî, hetkara hemserekîya DBPyî Halîde Turkogluye beşdarê mîtîngî bîyî.
Çakase: Ma do nêverdê ke wa cinîyî bibê hepisîyî
Qiseykerdişo verên hetê Senem Çakase ra ame kerdene. Çakase va ê do 31ê Adare de bibê serkewte û sey rojî roşnîye bidê. Qiseykerdişê Çakase wina dewam kerd: ”Ma do nêverdê ke cinîyî sey hepisîyan keye de bêrê girewtene. Kes nêeşkeno ma tîya ra bierşawo. Ma do 31ê Adare de bibê serkewte.”
Ozsoy: Ergodan keno cîya
Hişyar Ozsoyî zî wina qisey kerd: “31ê Adare ra dima ma do Çewlîgî îdare bikê. Yew hewteyo peyên mend. Ma wazenê ke bêhuzûrîyê û teşqele nêvejîyo. Provakasyonî estê, ti vana qey Serekkomar şer de yo û bi ziwanê şerî qisey keno. Her kesî keno cîya û yewbînî ra visneno. Ez wazena wa rojêk aver aqilê xo bîyaro xo sere.”
AKP- MHPyî de kadroyê ke bIeşkîyê welatî îdare bikê çin ê
Ozsoyî bale ante muhîmîya weçînayîşê 31ê Adare ser û wina va: ”Qet yew wext krîzê ekonomîyî yo winasî nêbi. Çewlîg de xeylî esnafan îflas kerd û dikanê xo padayî. Înan vatêne ‘Serekîye îstîqrar ana’, la halê ma û şarê ma eşkera aseno. Recep Tayyîp Erdogan û Devlet Bahçelîyî de, kadroyo ke bieşkîyo welatî îdare bikero çin o. Eke reyna bibê serkewte, o wext halê ma do hîna bibo bêter. Şorê sindoqan ser û reyanê xo bierzê ci û her kesî ra zî wina vajê.” Ozsoyî peynîya qiseykerdişê xo de Leyla Guvene û girewteyanê sîyasîyan ê hepisxaneyan rê silamî erşawitî.
Aydemîr: Çewlîg do bêxtê sîyayî pey de biverdo
Parlamenter Erdal Aydemîrî nameyê taxanê Çewlîgî humart û va ‘bextê nê taxan o sîya do bivurîyo û Çewlîg do 31ê Adare ra dima xizmet bivîno.’
Parlamenterê HDPyî yê kanî Îdrîs Balukenî yo ke Hepisxaneyê Tîpê Fyî yê Sincanî de yeno girewtene û hemserekê HDPyî yo kan Selahattîn Demîrtaşî yo ke Hepisxaneyê Edîrne de yeno girewtene, seba şarê Çewlîgî peyamî erşawitî û mîtîng de nê peyamî ameyî wendene.
Buldane: 31ê Adere seba Çewlîgî tarîxêko muhîm o
Pervîn Buldane wina qisey kerd: “Ez 24ê Hezîrane de reyna no meydan de bîya û nika reyna ez tîya ya û vînena ke humara ma her ke şono bena zêde. 31ê Adare de Çewlîg de xeylî çi do bivurîyo. Bi taybetî zî hetê ekonomîyî ra Çewlîg tenge de yo. Bi serran o ke AKP şaredarîye îdare keno, la halê rayîr û çopî eşkera aseno. AKP hende qîymet dano Çewlîgî. La qaşo yew wezîr Çewlîg ra yo û no wezîr ancax karê xo de nîyadano. Tîya de yew esnafo ke deynê ci yê kredîyî çin o nêmendo. Heywankarîye ameya qedênayene. Esnafî her roje berê dikananê xo padanê û îflas kenê. Ciwanî qewexane û kuçeyan de tal û betal fetelînê û humara bêkarîye her ke şono bena zêde. Ancax kesê ke paştîya xo zexm a kewenê kar û xebetînê. Bereketê nê erdî zaf o la şarê na herême sey karkero mewsimî bar keno û şono bajaranê Rojawanî de xebetîno.
Bawerîyî yenê cîyakerdene
60 mîlyon kes seba Seraye xebetîno. Ma seba ke nînan vanê, ma ra vanê terorîst, vanê bêdîn-bêîman. Fekê îqtîdarî ra yew roje çekuyêka rinde nêvejîya. Her roje dîn û îmanê ma rê qiseyan vano, la bizano ke ma girêdayeyê dînê xo yê û ma bi îmanî yê. Dînê ma de îftîra, zur, heqaret û cîyakerdêne çin a. Îqtîdarî xo rê dîno winasî kerdo sîyaset û Kurdan û Tirkan, Elewîyan û Sunîyan, cinî û camêrdan yewbînan rê keno dişmen.
Ferasetê şima yê edaletî hende yo
Yew serekkomar her roje îdarekaranê yew partîye rê nêeşkeno heqaret bikero. Ma roje nêdî ke bi qiseykerdişê xo 80 mîlyon kes yew dîyo û kerdo xo virare. Şarê Çewlîgî û Tirkîya naye heq nêkeno. Vano no welat de edalet esto, ma ke edalet esto o wext Îdrîs Baluken çira hepisxane de yo û 18 serrî ceza girewta? Selahattîn Demîrtaş û Fîgen Yuksekdage çira hepisxane de yê? Ferasetê şima yê edaletî êdî hende yo.
Îtîfaqê înan, îtîfaqê torosa sipêye yo
Vanê îtîfaqê komarî. Ma vizêrî dî. Mehmet Agar, Tansu Çilere girewtî xo het û vejîyayî meydanan. Îtîfaqê şima, îtîfaqê Torosa Sipêye yo. Ma şima kerdenanê înan nêzanê? Şima çira Agar û Çîlere sey namzedê şaredarîye nêmusnayî? Ma baş zanê ke weçînayîş ra dima, î yê îtîfaqî do nêmano. Vizêrî vato ‘eke ma 31ê Adare de ke nêbê serkewte, Çewlîg de do felakete bibo. Ê şima 17 serre yo ke Çewlîgî îdare kenê û naye ra pîl felakete esta gelo!
Wezîrê Edaletî do nê mergan key bivîno?
Parlamentera HDPyî Leyla Guvene ewro roja grevê vêşanîye ya 137î de ya. Seba ke tecrîd bêro wedaritene hepisxane û teberê welatî de merdimî kewtê grevê vêşanîye. Talebê ci meşru yo. Merdimî hepisxaneyan de bi çalakîyan şehîd kewenê. Ma wezîrê edaletî do nê mergan key bivîno! Ciwanî bi nê taleban mirenê. Şima do key bivînê, gonîya û mobalê nê ciwanan vileyê şima de ya.”
Qiseykerdişan ra dima grûba mûzîkî ya MKMyî Koma Çîya vejîyaye sahne ser û şarî bi coşêkê pîlî dest bi govende kerd. ÇEWLÎG
