Li Dîlokê welatiyê bi navê Umît A. ku du sal berê ji Şaredariya Bajarê Mezin a Dîlokê ji kar hat avêtin, hewl da xwe bişewitîne
Welatiyê bi navê Umît A. ku du sal berê ji Şaredariya Bajarê Mezin a Dîlokê ji kar hat avêtin, îro di saetên nîvro de hewl da xwe li ber derê şaredariyê bişewitîne. Umît A. ku çû şaredariyê û xwest bi seroka şaredariyê Fatma Şahîn re hevdîtin pêk bîne, daxwaza wî nehat qebûlkirin û piştî vê yekê Umît A. li ber derê şaredariyê cilê xwe ji xwe kir û hewl da xwe bişewitîne.
Hat hînbûn ku Umît A. dema hewldana xweşewitandinê de diyar kiriye ku gelek deynê wî heye û bi gotina ‘Zarokê min birçîne. 2 sal in bêkar im. Tazmînata min jî nedan. Mûçeya bêkariyê nikarim bigirim’ bertekên xwe aniye ziman.
Her wiha piştî mudaxeleyê polîsan Umît A. birin nexweşxaneyê. DÎLOK
