YSK ji bo veguhestina sindoqan ên li bajarên bakurê Kurdistanê hincetên sosret nîşan da. YSK bûyerên 30-35 sal berê jî wek hincet nîşan da û cihê gelek sindoqan veguhest
Lijneya Hilbijartina Bilind (YSK), bi biryara 6’ê Adara 2019’an, li bajarên bakurê Kurdistanê bi giştî 973 sindoq û cihê 96 hezar hilbijar hatiye guhertin. YSK di sedema veguhestina sindoqan de hincetên sosret nîşan da.
Hinceta YSK’ê ya veguhestina hîn siqdoqan wiha ye:
YSK’ê sindoqa Gundê Tellisirt a Agirê ya hêjmar 1289 ku 13 hilbijêrê wê hene veguhest gundê Ziyaretê. YSK’ê sedema vê yekê jî bi hinceta di sala 1995’an de li gundê Saritaşê 2 welatiyan propaganda rêxistinê kiriye nîşan da.
‘Li gund berdan hespan’
YSK’ê li gundê Çiftlîk a Kanîreşa Çewlîgê jî sindoqa hêjmar 1026 a 59 hilbijêrên wê hene veguhest gundê Mollaşakirê. YSK’ê sedema vê yekê jî hinceta ‘Şikdarên ku li gundê Çiftlikê îkamed dikin li nava gund berdane hespan û rageşî derketiye û ji ber vê yekê Onur Çakmak birîndar bûye’ sindoq veguhest.
Di sala 98’an de pê li teqemeniyê kir!
YSK’ê li gundê Dîlek ê navenda Dêrsimê jî sindoqa hêjmar 1099’an a 38 hilbijêrê wê heye veguhest gundê Karşilarê. YSK sedema vê yekê jî hinceta ‘Dibe ku PKK çalakiyan pêk bîne û di 13’ê Mijdara 1998’an de welati pê li mayinê kiribû’ nîşan da.
33 sal berê pankart vekir
YSK’ê li gundê Taht ê navenda Dêrsimê sindoqa hêjmar 1126 an a 12 hilbijêrê wê hene veguhest Malên Kom ên Ali Koç. YSK sedema vê yekê jî hinceta 33 sal berê bûyer pêk hatiye nîşan da. YSK’ê dîsa hincet nîşan da ku di 7’ê Îlona 1986’an de afiş hatiye vekirin.
‘Dibe hilbijartin bi rageşî derbas bibe’
YSK ji bo navçeya Pirsûsê ya ku di hilbijartina berê de parlamenterê AKP’ê bi çekan êrîşî esnaf kiribûn û bav û 2 kurê wî kuştin jî biryar da ku sindoqa hêjmar 1151’an a Kuçukkopru veguhezîne Buyukziyaretê. YSK’ê hincet nîşan da ku dibe hilbijartin bi rageşî derbas bibe.
Ewlehî tuneye!
YSK ji bo sindoqa hêjmar 1036’an a gundê Harmantepe jî wiha got: “Bûyerê terorê tuneye. Lê dibe di çûyîn û hatinê de çalakî bên lidarxistin.” AMED
