Hevserokê HDP’ê Sezaî Temellî li Bismilê bi gel re hat gel hev. Temellî ji her kesî xwest ku teqez roja hilbijartinê biçin dengê xwe bi kar binin û xwedî li sindoqan derkevin
Hevserokê HDP’ê Sezaî Temellî, di çarçoveya xebatên hilibjartinê de li navçeya Bismilê ya Amedê bi gel re hat cem hev. Temellî li gel baran û gijlokê (zîpik) bi girseyî hat pêşwazîkirin. Dema karwana HDP’ê ket navçeya Bismilê, girseyê heyet bi def û zurneyan pêşwazî kir. Tevî baran û zîpikê bi hezaran Bismilî li Qada Newrozê kom bûn û Newroz pîroz kirin. Namzetên HDP’ê yên Hevşaredariya Bismilê Gulşen Ozer û Orhan Ayaz gel silav kirin. Parlamenterên HDP’ê û namzeta HDP’ê yên Şaredariya Bajarê Mezin a Amedê Hulya Alokmen jî dev li mitîngê bûn. Gel di mîtîngê de bê navber dirûşmên ‘HDP gel e, gel li vir e’, ‘Leyla Guven rûmeta me ye’, ‘Bijî Serok Apo’ û ‘Bijî berxwedana zindana’ berz kirin. Hevserokê HDP’ê Sezaî Temellî jî piştre derket ser dikê û gel silav kir.
Temellî di destpêka axaftina xwe de bal kişand ser çalakiyên greva birçîbûnê û anî ziman ku Leyla Guven 140 roj in li dijî tecrîdê di grevê de ye û 140 roj in li vî welatî li dijî bê hiqûqî û bê edaletiyê têdikoşe. Temelî da zanîn ku li Hewlerê Nasir Yagiz û li hemû deverên cîhanê hevalên wan li dijî tecrîdê di grevê de ne û wiha domand: “Dixwazin tecrid bi dawî bibin. Dixwazin ev bê hiqûqî û bê edaletî bi dawî bibe. Em ê nemirin, em ê bijîn û li ber xwe bidin. Heta tecrida li Îmraliyê bidome, edalet û hiqûq naye vî welatî. Em dibêjin bila tecrîd bi dawî bibe. Em dixwazin birêz Ocalan bi rêk û pêk bi parêzer û malbata xwe re hevdîtin bike.”
Dê gel bi ser bikeve
Tememllî xwest teqez her kes roja hilbijartinê biçin dengê xwe bi kar bînin û xwedî li sindoqan derkevin û da zanîn ku di vê hilbijartinê de gel û HDP dê bi ser bikevin. AMED
