Awayo ke eyseno desthilatîya dagirker û tekparêze bi nê tecrîdê ke bi serran o domnena wazena şarê Kurdî bido cezakerdişî la, tecrîd şarê Kurdî zî zêdehîrî zerar dano qanûn, hiqûq û demokrasîya Tirkîye û heme civake aye ro. Bêvengîya ke civake eyro tedeya bi xo zî go siba roc tesîrê xo yê neyînî bimojno ra. Ay ra sebeb hema ke nêbiyo erey lazimo hem şarê Kurdî hem zî heme civake Tirkîye hemverê nê tecrîdî bêveng nêmano û vengê xo berz bikero. Sey ke yeno zanayîşî nizdê panc aşmî yo sere de Parlamentere Leyla Guvene, Nasir Yagiz û giroteyê azadî bi seyan kesî semedê wedartişê tecrîdî grevê veyşanî domnenê û çi heyf ke na desthilatî yew û nîme xo ra nîna war û heta nê rayîrî de qanûnanê xo temam binling kena.
Aşmî û serrî vêrenê û tecrîd domêno. Roc û aşmî vêrenê û grevê veyşanî domêno. Çi heyf ke tecrîdîdir bêxemîya ma û grevê veyşanîdir bêvengîya ma domêna! Bi xofedatîya çar çirayanê tarîya tecrîdî. Çar delalanê zerre dayan. Zulkuf, Ayten, Zehra û Medyaye ke bi canê xo tecrîdo bê qanûn û bêhiqûq protesto kerdî, rayêke bîne bêînsafî û nemerdîya desthilatan verê çimanê merdimahî de fîya ra. Mîyanê nê çar aşman de pêwa Ûgûr Şakarî ya panc cananê ma yê ciwanan xo feda kerd û çi heyf ke ma bêvengî û bêbertekîya xo eynî awayî domnenê. Lazim o ma bivînê û bizanê ke na bêvengî û bêbertekîya ma cesaret dana desthilatê bêqanûn û bêqaydeyan. Wina cesaret dana ke verê çimanê ma de, verê çimanê heme mislimananê alema îslamî de û verê çimanê heme humansîtanê dinya de eşkena heqê definkerdişê cenazeyanê ma ke goreyê îslamîyetî ra zî goreyê heme bawerîyan û fikranê bînan ra zî heqêke merdimahî yo, ma dest ra bigîro.
Baş yeno zanayîşî ke rêzdarîya merdan rê, rêzdarîya cenazeyan rê emrêke dînê îslamî yo la, na desthilatîya ke xo misliman û bawermend mojnena ra nê emrê dînê îslamî bi xerakerdişê cenazeyan, goran ra vetişê merdan û astengkerdişê definkerdişan binling kena û hemverê nê kerdişanê aye zî heme aleme îslamî bê veng manena.
Mîyanê nê çar aşman de şarê Kurdî etre cuwîyînê bi seyan ewladanê xo de bî rayedarê desthilatî zî etre qoltuxanê xo de bî. Ser de zî propagandaya weçînayîşî açarna vengdayîşê şerr û kîndarîya mîyanberê şaran. Rayedaranê desthilatî weçîneyaşî kerdê melzemeyê kîndarî, nefret û nîjadperestî. Destpêkerdişê propagandaya weçînayîşî de heme esnafî, marketî, balîcanî, îsot û firîngî bî terorîst î, dima ra dore amî HDPyî û weçînayoxanê aye, dima ra estbîyayîşê welatê Kurdan ame înkarkerdişî û bi zûra ke ro cinîyan amî kerdişî hestê şarî hetê dînî ser ame îstismarkerdişî.
Dima ra destikêke bîn înan rê vecya. Qetilkerdişê pancas tenan ê ke bi destê terorîstêke hovî ke Zelayandaya Newî de di hebî camîyan de pêk ard sey nîmetêke propagandaya weçînayîşî heme mitînganê xo de ard ziwan. Yewo ke goş bişano vatişanê înan go vaco qey şerê misliman û xaçîyan dest pê kerdo û Tirkîye dest ra şina. Yanê rayedarê na desthilatî ke semedê çend hebî şaredarîyan her roc barre barre kenê, fitne û fesadî mîyanberê şaran de kenê vila semedê cuwîyînê bi seyan însanan, bi seyan hemwelatîyan hes înan ra nêvecêno. Ma zî eka ra nê desthilatdarê qoltuxperestan ra vacê vengê ma ayê ke şeran wazenê, kîndarî mîyanberê şaran de kenê vila, merdimahî tecrîd kenê, ayê ke cenazeyan remnenê û merdan gorr ra vecenê rê çinyê. Vengê ma înan ê ke semedê azadî, aştî,demokrasî û têduştîya mîyanberê merdimahî kede daya û danê rê ya.
