HDP’ê diyar kir ku bi destpêkirina pêvajoya xebatên hilbijartinê re bi talîmata desthilatdariyê heta niha 713 kes hatine binçavkirin
Berdevka Komîsyona Hiqûq û Mafên Mirovan a HDP’ê û parlementera Êlihê ya HDP’ê Ayşe Acar Başaran derbarê operasyonên siyasî yên li ser partiya xwe daxuyanî da.
Başaran bilançoya operasyona qirkirina siyasî ya li dijî helê kurd, endam, rêveber û namzedên wan ên meclisa şeradariyan aşkera kir. Başaran li ser girtin û binçavkirina ev agahî par ve kir: “Di 30’ê adarê de li Stenbolê gelek jê namzetên me yên meclisa şaredariyê, bi giştî 53 kes hatine binçavkirin. Li Edeneyê jî Hevserokê me yê bajêr jî di nav de 8 endamên partiya me hatine girtin. Li Îdirê jî 15 endamên HDP û DBP’ê hatibûn binçavkirin û 9 kes hatin girtin. Li Wanê jî 24 kes hatibûn binçavkirin û 14 jê hatine girtin. Li Rihayê jî endamên me yên meclisa şaredariyê jî di nav de 11 kes hatine binçavkirin. Ji destpêkirina xebatên hilbijartina 31’ê adara 2019’an û heta niha 713 kes hatine binçavkirin û 107 kes hatine girtin.”
Başaran destnîşan kir ku dê desthilatî bi vê yekê negihêje armanca xwe û ev tişt anî ziman: “Tifaqa AKP û MHP’ê bi binçavkirin û girtine, endam, rêveber, muşahîd, nûnerên me yên partiyê û endamên meclisê yê şaredariyê dê nikaribe bigihêje armanca xwe. Me li hemberî faşîzmê li ber xwe da, em ê li ber xwe bidin û em ê li ser sindoqan jî li ber xwe bidin. Dê sibê vê bloka faşîst were belavkirin. Li ser vî esasî em bang li gelê xwe dikin ku biçin ser sindoqan û îradeya xwe ya demokratîk û berxwedêr bidin diyarkirin.”ENQERE
