Hemsereka Pêroyî ya HDPyî Pervîn Buldane va: “Ma zanê ke Mûş de ma ser kewtî, ma qebûl nêkenê ke heqê ma, ma destê ra bêrê girewtene.”
Hemsereka Pêroyî ya HDPyî Pervîn Buldane û namzedê HDPyî yê hemşaredarîya Mûşî Sirri Sakikî vat ke Mûş de HDP ser kewt, la AKPyî hîle kerde.
Doneyê muhîmî destê ma de estê
Sirri Sakikî ard ziwan, hîle û fenekê girdî netîceyanê weçînayîşî de ameyê kerdene û vat, înan 5 reyî îtîraz kerdo, la îtîrazê înan nêameyê qebûlkerdene û dewamê ci de va: “Ma hêvî kenê YSK ney newe ra organîzasyon keno. Ma zanê ke şar ma wazeno. Şarî ra se ra 70î mojno ma ke serekê şaredarîye êdî nêeşkeno nê bajarî îdarê bikero. No zî heqdarî ya mojneno.”
Buldane: HDPyî morê xo da weçînayîşî ro
Pervîn Buldane zî va: “Ma teba parlamenteranê xo Huda Kaya, Garo Paylan û heyetêk Mûş de yê. Ma zanê weçînayîşê cayîyan ê 31ê Adare de pêroyî yê Tirkîya de hîle û neheqîyêka girde ameye kerdene. Ma zanê ke xeylî bajaran de ma ser kewtê. Formulê AKPyî yê binkerdişê HDPyî teyna kampanya weçînayîşê de ney, heta roja weçînayîşî de zî ame dewamkerdene. Estbîyayîşê HDPyî û stratejiya ci bi hêvî morê xo da weçînayîşî ro.”
Mûş de hîle esto
Buldane ard ziwan ke serdestî ewro Mûş de eynî metodî keno ra xo ver û va: “Ma vizêrî ameyî Mûş. Goreyê doneyê ke restê verê destê ma, bi taybetî merkezê Mûşî de ferqa 538 rayan esta. Hûmara rayan a ke nevîyartbar ameya hesibnayene zî 2449 a. Na zî musnena ma ke tîya de hîle esto. Ma tîya ra vanê; sere de YSK, selahîyetdarê weçînayîşî yê bajar û qezayan binê fermanê AKPyî de yê. Bi îradeyê xo nêeşkenê qerar bidê. Hem seba Mûşî hem zî seba cayanê bînan ma do muracatê Mahkemeya Qanûnê Bingeyînî û Mahkemeya Heqanê Merdiman ya Ewropa bikerê. Ma zanê îradeyê şarê ma yê Mûşî ameyo xespkerdene. Hemşaredarê Mûşî Birêz Sakik û Birêz Genç ê.” MÛŞ
