Rêxistina HDPyî ya Çewlîgî derheqê weçînitişî de eşkerayîyêk daye û xo rexne kerde. Hîşyar Ozsoyî va: “Ma şarê xo sucdar nêkenê, ewnîyenê xo ra, ma ça de xeta kerde, kêmanîye kerde nînan ser vindenê.”
Partîya Demokratîke ya Şaran (HDP) ya Çewlîgî kombîyayîşêk viraşt û weçînitiş ercna. Parlamenterê HDP’yî yê Çewlîgî Erdal Aydemîr, namzedê hemşaredarîye yê bajarî Senem Çakase û Hîşyar Ozsoy û hemserekê partî yê bajarî Veysel Kaya û xeylî hemwelatijî tewrê kombîyayîşî bîyî.
Hîşyar Ozsoyî derheqê weçînitişî de wina va: “Stratejîya partîya me ser kewte. Şaredarîyê ma yê ke ameyîbî xespkerdene ma peyser girewtî û bajaranê Tîrkîya de îqtîdarî rê da vîndîkerdene. La Çewlîg de weçînitiş sey waştişê ma nêbi. Ma şarê xo sucdar nêkenê, ewnîyenê xo ra, ma ça de xeta kerde, kêmîye kerde nînan ser vindenê. Ma şansê xizmetê şaredarîye vîndî kerd. Berpirsîyarîya naye sey partî milê ma de ya. Na kêmîye ya mi û embazanê mi ya. Çi heyfo ke ma ferqê şaredarîye ya HDPyî werte nêkerd. La mucadele dewam keno. Ma do Çewlîg de xetayanê xo bigê çiman ver û rêxistinkî xo bihêz bikê. Ma do Çewlîg de cayê sîysetî abikerê. Heme embazê ma ke tewrê xebate bîyê înan rê spas kena. Netîceyê weçînitşî wa bixeyr bî. Ma do ewro ra tepîya bi heme hêzê xo semedê meseleyanê esasîyan grevê vêşanîye û tecrîdî tê bigêrê.” ÇEWLÎG
