Ji 4 çalakvanên greva birçîbûnê ya li Almanyayê Şiyar Xelîl ji ber ku rewşa giran bû rakirin nexweşxaneyê. Hat zanîn ku rewşa Xelîl giran e
Ji bo rakirina tecrîda girankirî ya li ser Rêberê Gelê Kurd Abdullah Ocalan, kurdistaniyên bi navên Omer Bagdur, Cemalê Kobanê, Şiyar Xelîl û Mele Mustafa Tuzak li Almanyayê çalakiya greva birçîbûnê ya bêdem û bêdorveger dabûn destêkirin. Hefteyek berê jî çalakvanan biryar dan ku çalakiya xwe li paytext Berlînê berdewam bikin.
Aktîvîstên kurd di hundirê karavanekê ya li parqeke di navbera avahiyên meclisa federal û serokwezîrtiyê de çalakiya xwe didomînin. Li gorî agahiyan, ji çalakvanan Şiyar Xelîl rewşa wî ya tenduristiyê piştî nîvro giran bû û ji ser hişê xwe çû. Li ser vê yekê jî bang li ambûlansê hat kirin û Xelîl rakirin nexweşxaneya Chariteyê. Tê gotin ku rewşa Xelîl krîtîk e.
Şiyar Xelîl ji bajarê Dêrikê yê rojavayê Kurdistanê ye û 69 roj in di greva birçîbûnê de ye. Xelîl demek berê wiha bang li Hikûmeta Federal a Almanyayê û derdorên demokratîk kiribû: “Em ji raya giştî dixwazin ku bala xwe bêhtir bidin ser tecrîdkirina Rêberê me. Me xwest li paytext Berlînê dengê xwe bêhtir bidin bihîstin. Serkeftin dê ya me be.” BERLÎN
