Dozgerîya Riha, Leyla Guvene zî tede derheqê 35 kesan de qerarê bêteqîbîye dabi, la dima ra no qerar bedilnaye. Dozgerî bi îdîayê nêvurnayî û taleb kerd ke na dolime doze bêra akerdene
Serra 2017î de seba ke beşdarê aktîvîteya roja pîrozbîyayîşê Rayberê Şarê Kurdî Abdullah Ocalanî bîyê, Hemsereka KCDyî Leyla Guvene, waya Abdullah Ocalanî Fatma û birayê ci Mehmet Ocalan zî tede, derheqê 35 kesan de tehqîqat amebî akerdene û peyê cû qerarê doze ame girewtene.
Qerarê bêteqîbîye ra 2 serrî dima reyna doze ameye akerdene. Doze hetê Dozger Ozkan Gîrgînî ra ameyebî akerdene û 9ê Çele de reyna eynî dozgerî qerarê bêteqîbîye dabi ci. Reyna eynî dozgerî 20 roje peyê cû, roja 1ê Sibate de, îdîa û delîlî nêvurnayî û qerarê xo yê verî vurna, waşt ke derheqê Leyla Guvene û kesanê binan de dawa bêro akerdene û seka nê 35 kesan 1 serre ra heta 5 serran cezayî bêrê dayene.
Îdîaname hetê 10. Mehkemeya Cezaya Girane ya Riha ra ame qebûlkerdene. Mahkeme roja 27ê Adare de bîye û Leyla Guvene seba ke grevê vêşanîye de ya nêeşkîya beşdarê mehkeme bibo û derheqê ci de ‘qerarê bi zorardişi’ ame girewtene. Avûkatan va seba ke bêteqîbîye nêameya berzkerdene û doze ameya akerdene îtîraz kerd, la mehkeme îtîraz qebûl nêkerd. AMED
