KCK’ê ragihand ku li rojhilatê Kurdistanê û Îranê bi sedan kes ji ber lehiyê mirin, bi deh hezaran malbat mexdûr bûn. KCK’ê diyar kir ku hiş û hestê piştevaniyê yê gelê kurd xurt e, divê ev ruhê piştevaniyê ji bo rojhilatê Kurdistanê li her cihî were nîşandan
Hevserokatiya Konseya Rêveber a KCK’ê li ser karesata lehiyê ya li Rojhilatê Kurdistanê û Îranê daxuyaniyek da. KCK’ê diyar kir ku li rojhilatê Kurdistanê û Îranê ji ber barana zêde bi sedan mirovî jiyana xwe ji dest dan, zerar li mal, bexçe, zevî û kargehên bi deh hezaran malbatî bû. KCK’ê ji malbatên kesên jiyana xwe ji destdane sersaxî xwest û wiha got: “Rehma Xwedê li mirovên li Rojhilatê Kurdistanê û Îranê jiyana xwe ji dest dan be. Bila serê malbat û xizmên wan sax be.”
Di daxuyaniyê de hat destnîşankirin ku kerasetên bi vî rengî yên xwezayî ji bo civakan hinceta piştevaniyê ye û wiha got: “Nirxê herî girîng ê jiyana civakî ew e ku di rewşeke bi vî rengî de piştevaniya hev bikin. Kurd jî ku gelekî li cografya civakîbûna destpêkê ya mirovahiyê ye, hiş û hestê piştevaniyê timî parastiye. Li dijî afetên bi vî rengî û zextên ji derve bi piştevaniyê hebûna xwe heta vê demê aniye. Di karesata lehiyê de jî ya li rojhilatê Kurdistanê û Îranê vê piştevaniyê nîşan bide. Kurd û gelên cîran dê derfetên xwe hemûyan ji bo mexdurên lehiyê bi kar bînin.”
Piştevanî nirxê herî bi wate yê civakî ye
KCK’ê bi berdewamî ev tişt anî ziman: “Nirxê piştevaniyê nirxê herî bi wate yê civakî ye. Ji bo gel û netewebûnê jî pêwîstî bi piştevaniyeke xurt heye. Yên ku piştevaniya wan ne xurt be ne dikarin bibin gel ne jî netew. Nikarin bibin xwedî jiyaneke azad û demokratîk. Ji ber vê yekê divê ji bo gelên rojhilatê Kurdistanê û Îranê di asta herî bilind de piştevanî bê kirin. Pêwîste rojev û hewldana bingehîn a vê kêliyê ev be. Bêyî li benda dewletê bimîne divê gel di nava xwe de piştevaniya hev bike. Şaş e ku her tişt ji dewletê bê hêvîkirin. Dewlet ew organ e ku berjewendiyên beşekê temsîl dike, ne yê civakan.”
Bendewariya ji dewletê dê piştevaniyê kêm bike
KCK’ê xwest tu kes nekeve nav bendewariya ji dewletê û ev tişt anî ziman: “Bendewariya ji dewletê tê wateya kêmbûna piştevaniyê, qelsbûna piştevaniyê. Ev yek ji bo civakan qelsiya herî mezin e. Li Kurdistanê karesatên bi vî rengî timî rû didin, lewma divê piştevaniya civakî bê xurtkirin. Ev yek jî bi civakeke demokratîk a rêxistinbûyî dibe. Karesatên bi vî rengî pêwîstiya bi rêxistinbûnê nîşan didin û divê bibin wesîleya xurtkirina rêxistinbûnê.”
Divê li her cihî bikevin nava liv û tevgerê
Di daxuyaniyê de KCK’ê xwest ji parçeyên din ên Kurdistanê jî bêyî ku hebûna sînoran nasbikin piştevaniyê bikin û wiha got: “Dema ku rastiyeke bi vî rengî li Kurdistanê rû da, divê gelê me yê li parçeyên din û derveyî welat piştevaniyê bike. Hebûna sînoran divê vê piştevaniyê ne qels bike ne jî asteng. Bi taybetî parçe, herêm û bajarên nêzî cihê karesatê ne, divê hîn bi rengekî çalak bi berpirsyarî tevbigerin. Gelê kurd ê li derveyî welat jî girîng e di rewşeke wiha de tavilê piştevaniyê bike. Hiş û hestê piştevaniyê yê gelê kurd xurt e, divê ev ruhê piştevaniyê ji bo gelê me yê li rojhilatê Kurdistanê li her cihî were nîşandan.”
KCK’ê her wiha xwest ku rejîma Îranê ji bo alîkariya mirovî nebe asteng û ev tişt got: “Em ji dewleta Îranê hêvî dikin, di karesaetên wiha de li pêşiya alîkariya gelê kurd a li derveyî sînorên Îranê nebe asteng û pêşî li piştevaniyê veke. Nêzîkatiya ku di karesatên wiha de bê nîşandan, dê ji bo xurtkirina biratiya navbera gelan girîng be. Ji ber vê yekê divê alîkariya gelên Îranê û gelê kurd a ji bo mexdûrên lehiyê bigihêje cihê xwe.”
Di dawiya daxuyaniya xwe de jî KCK’ê piştevaniya xwe anî ziman û wiha got: “Em; Tevgera Azadiyê ya Kurd di karesaetên wiha de timî bi gelê xwe re ne. Ji bo birînên gelê me yê li rojhilatê Kurdistanê bên pêçandin û gelê me yên li parçeyên din piştgiriyê bide em ê wezîfeya dikeve ser milê xwe bi cih bînin. Em pê bawer in ku gelê me dê bi piştevaniyê birînên xwe bipêçe û careke din ji gelê xwe yê zerar dîtine re dibêjin; derbasî be.” BEHDÎNAN
