Parlamentero verên ê HDPyî yê Çewlîg û Amedî Îdrîs Balukeno ke dewaya ‘serekkomerî rê heqeretkerdişî’ ra yeno muhakemekerdene de, seba ke bi rayîrê SEGBÎSî tewrbîyayîşê roniştişî red kerdo, qerarê bi zor ardişê odaya SEGBÎSî ame dayene
Parlamentero verên yê Partîya Demokratîke ya Şaran (HDP) yê Çewlîg û Amedî Îdrîs Balukeno ke dewaya ‘serekkomerî rê heqeretkerdişî’ ra yeno muhakemekerdene de, seba ke bi rayîrê SEGBÎSî tewrbîyayîşê roniştişî red kerdo, qerarê bi zor ardişê odaya SEGBÎS’î ame dayene. Avûkata Îdrîs Balukenî, Yalçındage ard ziwan ke, cayê nê qerarî qanûnê bingeyênî de çin o.
Derheqê Îdrîs Balukeno ke Zîndanê Tîpê Fyî yê Sîncanî de yeno girewtene de qerarê ‘bi zor ardişê odaya SEGBÎSî ame dayene. Mahkeme verê cû zî derheqê ci de qerarêko winasî dabi û Balukenî o wext zî bi rayîrê SEGBÎSî tewrbîyayîşê roniştişî redkerdibi.
Avûkata Balukenî Reyhan Yalçındag Baydemîre, ard vîrî ke derheqê muwekilê aye de dewayê ke heta nika ameyê akerdene, wexto ke muwekîlê aye hetkarê serekê Grûba HDPyî bîyo, rîyê qiseykerdiş û eşkerayîyê ke dayê rayapêroyî ra ameyî akerdene û vat, rixmê naye, azadîya îfadeyî û fikirîyayîşî muwekîlê aye amey, çinkerdene û derheqê ci de xeylî dewayî ameyî akerdene.
Mumkin nîyo ke ma nê qerarî qebûl bikerê
Avûkate Yalçindage reaksîyon da qerarê mahkeme yê ‘bi zor ardişê odaya SEGBÎSî û va ‘mumkun nîyo ke ê nê qerarê mehkeme qebul bikerê’ û wina dewam kerde: “No qerar huqûqî nîyo, çunke bi zor ardişê odaya SEGBÎSî, yeno manaya kesêkî bi xebitnayîşî zorê fîzîkî ardişê oda yo. Çîyêko winasî hewca nêkeno. Verê cû zî parlamenteranê bînan rê zî wina kerd. Fîgen Yuksekdage û Selma Irmake rê zî wina kerdibi. Ma huqûqnasan no kerdiş reya tewr verêne parlamenteranê HDPyî reyde şinasna. Bi zor ardiş, kesê ke hepisxaneyan de nîyê rê yeno kerdene. Oxro ke ma tîya de qalê keso ke xora mîyanê çar desan de yo kenê. No qeraro ke ameyo dayene hem hetê usulî ra hem hetê qanûnê bingeyênî ra huqûqî nîyo.” AMED
