Serokwezîrê Iraqê Adil Evdilmehdî bi serdaneke fermî çû Îranê. Lîderê giyanî yê Îranê Seyid Elî Hamaney xwest ku leşkerên DYA’yê ji Iraqê bên derxistin
Serokwezîrê Iraqê Adil Evdilmehdî ku li ser vexwendina serokkomarê Îranê Hesen Rûhanî çûyî Tehranê, bi lîderê giyanî Seyîd Elî Hamaney û Serokkomarê Îranê û gelek rayedarên Îranê re rûnişt.
Piştî hevdîtinê Hamaney got ku amerîkî li ku derê demeke dirêj mabin, pêvajoya derxistina wan a ji wan welatan zehmet dibe. Hamaney got ku amerîkî , ‘demokrasiya Iraqê’ û hebûna aktivîstên siyasî dijberî xwe dibîne û wiha got: “Leşkerên amerîkî demildest divê ji Iraqê werin derxistin. Amerîkî û dûvelingên wan ên li herêmê, dijberê avaniya demokratîk a niha ya li Iraqê û dijberê desthilata niha ne û vê di berjewendiya xwe de nabînin.”
Hamaney her wiha diyar kir ku amerîkî ne tenê bi armanca leşkerî li Iraqê ne, dixwazin domdirêj bimînin û hewl dide ku dewletên herêmê dîzayn bike.
Serokwezîrê Iraqî Evdilmehdî jî wiha got: “Dewlet û gelê Îranê di her demên zehmet de li cem dewleta Iraqê û gelê Iraqê ne. Mînaka vê ya dawî, bi desteka Îranê têkbirina DAÎŞ’ê ya li Iraqê ye.” TEHRAN
