Şandeyeke ku ji endamên Saziya Peywendiyên YNK’ê pêk dihat çû serdana Nasir Yagiz ku 138 rojin ji bo rakirina tecrîda li ser Ocalan di çalakiya greva birçîbûnê de ye. Şandeyê ji dewleta tirk xwest ku tecrîda li ser Ocalan bi dawî bike
Çalakiya greva birçîbûnê yê bêdem û bêdorveger ku endamê Meclisa Partiya Demokratîk a Gelan (HDP) Nasir Yagiz li Nûnertiya HDP’ê ya Hewlêrê ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin, di roja 138’emîn de didome. Îro jî şandeyeke ku ji Saziya Peywendiyên Yekitiya Niştimanî ya Kurdistanê (YNK) pêk dihat, çû serdana Yagiz.
Di serdanê de şandeyê rewşa tenduristiyê ya Nasir Yagiz pirsî. Di heman demê de şandeyê serkeftina HDP’ê ya di hilbijartinên rêveberiyên herêmî de jî pîroz kir. Ji endamên Saziya Peywendiyên YNK’ê Xalîd Biradostî anî ziman ku tevî zextên dewletê yên li ser endam û alîgirên HDP’ê jî, HDP’ê serkeftineke mezin bi dest xist.
Xalîd Biradostî anî ziman ku ew bi hemû awayî piştgiriya çalakiyên greva birçîbûnê dikin û xwest ku dewleta tirk daxwazên çalakvanan bi cih bîne û dawî li tecrîda ser Ocalan bîne. HEWLÊR
