Parlamentera Partîya Çepe ya Almane Zaklîn Nastîce vat ke halê tepişteyanê sîyasîyan ê Tirkîya biqesawet o û va: “Bêvengîya cimatê mîyanneteweyî û hukmatê federalî şerm o.”
Endama Meclîsê Federalî yê Partîya Çepe Zaklîn Nastîce eşkerayîyêk daye û bêvengîya cimatê mîyanneteweyîyî bi taybetî zî hukmatê federalî yê bi serekwezîrîya Angela Merkele rê bi hawayêkê çetinî reaksîyon da.
Seba Tepişteyanê Sîyasîyan Vengdayîşê Edaletî!
Parlamentera Almane Nastîce ard ziwan ke qewimîyayîşê ke Tirkîya de benê û halê tepişteyanê sîyasîyan ê Tirkîya kesî fînenê mîyanê fikaran û va: “Rejîmê Erdoganî wextêko derg o ke ercanê bingeyênan ê heqanê merdiman û prensîbê dewleta huqûqe ra dûrî kewto. Bêvengîya cimatê mîyanneteweyîyî û hukmatê federalî şerm o. Ez seba heme tepişteyanê sîyasîyan ê Tirkîya waştişê edaletî kena.”
Partîya Çepe ya Almane menga Adare de paştdayîşêko muhîm dabi çalakwananê grevê vêşanîye ke wazenê tecrîdê Îmraliyî biqedîyo. Hemserekê Partîya Çepe Bernd Rîexînger, hemserekê koma partiye Dîetmar Bartsch û hetkara hemserekanê partîye Martîna Rennere zî tede 20 parlamenteran deklarasyonêk îmza kerdibi û veng dabi Tirkîya ke çarçewaya peymeyanê dewleta huqûqe de nizdê tepişteyan bibo.
Rixmo ke nê deklarasyonî ser o 10 rojî ravêrtê zî hewna hukmatê Merkelî derheqê babete de gamêk nêeşta. BERLÎN
