Ji bo japonan pirtûka rêzimana kurdî hat amadekirin. Di pirtûkê de bi giştî 20 mijar hene û her wiha ferhenga kurdî-japonî cih digire
Pirtûka pêşî ya rêzimana kurdî ya bi japonî, ji Weşanxaneya Nûbiharê derket. Pirtûka Rêzimana Kurdî ya bi japonî ji 225 rûpelan pêk tê û ligel mijarên rêziman, beşa ferhengê jî tê de heye.
Mamosteyê Zimanê Kurdî li Zanîngeha Lêkolînên Biyanî ya Tokyoyê, Vakkas Çolak demek berê mizgîniya vê pirtûkê dabû. Çolak gotibû wî pirtûka Rêzimana Kurdî ligel Prof. Dr. Abdurrahman Gulbeyaz û lêkolînerê japon, Takenori Murakami amade kiriye.
Vakkas Çolak got ku di pirtûkê de ji mijarên asta destpêkê û ya navîn bi giştî 20 ders/mijar hene. Çolak da zanîn ku di pirtûkê de wan cih daye bikaranîna peywan li cihên cuda û herwiha cih daye peyvên li gorî herêman diguherin.
Pirtûk ji du beşên sereke pêk tê, di beşa yekê de behsa rêzimana kurdî dike û di beşa duyemîn de jî ferhenga kurdî-japonî heye ku zêdeyî 2 hezar peyvan cih digirin. TOKYO
