Derket holê ku qeyûmê tayînî Şaredariya Êlihê hatibû kirin, şaredarî xistiye bin 240 milyon TL deyn û niha deynê şaredariyê bi giştî 307 milyon û 328 hezar û 305 lîre ye
Di 11’ê îlona 2016’an de Wezareta Karên Navxweyî cîgirê walî Şevket Aksoy wekî qeyûm tayînî Şaredariya Êlihê kir. Derket holê ku qeyûm di nav 2 sal û nîvan de şaredarî heta qirikê di nav deynan de hiştiye.
Piştî hilbijartina herêmî ya 31’ê adarê hevşaredarên HDP’î Songul Korkmaz û Mehmet Demîr bi ser ketin û şaredarî dewr girtin, deynên qeyûm derketin holê. Derket holê ku qeyûm di nav 2 sal û nîvan de şaredarî xistiye bin 240 milyon TL deyn û niha deynê şaredariyê bi giştî 307 milyon û 328 hezar û 305 lîre ye.
Dê nelirêtiyên qeyûm teşîr bikin
Hevşaredarên Êlihê Songul Korkmaz û Mehmet Demîr li ser mijarê axivîn û bilêv kirin ku ew ê van deynan lêkolîn bikin û yek bi yek ji gel re ragihînin. Hevşaredar Mehmet Demîr bilêv kir ku bi qeyûman hatiye xwestin ku şaredariyan têxin bin deynan daku ew nikaribin xizmetê bikin. Demîr wiha got: “Em ê pêşî van deynan teşhîr bikin. Ev pere çûne kuderê? Em ê yeko yeko lêkolîn bikin û ji gel re ragihînin. Bila kes nebêje şaredariyeke ev qas deynê wê heye dê nikaribe xizmetê bike. Em ê tevî gel bi rê û rêbazeke herî baş xizmetê bikin.”
Hevşaredar Songul Korkmaz jî destnîşan kir ku ew ê pêşî nelirêtiyên hatine kirin aşkere bikin û wiha got: “Niha 307 milyon lîre deyn heye. Em li aqûbeta mal û milkên şaredariyê lêkolîn dikin. Di rojên pêş dê ev dîmen zelal bibe û em ê aşkere bikin.” ÊLIH
