Zîndanê Xarpêtî de di hepsîyê ke tewrê Mahsûm Pamayo ke vera tecrîdê Îmrali de çalakîya fedaî viraştbî û netîceyê çalakîye de şehîd bibî mendêne, kerdî qawişê endamanê DAIŞîyan. Keyeyê hepsîyan seba merdimanê xo muracatê ÎHDyî kerdî
Hepsîyo sîyasî Mahsûm Pamayo 22 serrî ke Zîndanê Xarpêtî de tewqîfkerdebî 5ê Nîsane de seba protestokerdişê tecrîdê serê Rayberê PKKyî Abdullah Ocalanî çalakîya fedaî viraştbî û netîceyê çalakîye de şehîd bibî. Badê hedîseyî îdareya zindanî hepsîyan ra Talîp Kalin û sewbîna yew hepsîyo ke nameyê ci nêame zanayene û verê cû tewrê Pamayî yew ode de mendêne, kerdî qawişê endamanê DAIŞîyan.
Hewteyo verên roja dişeme Talîp Kalinî bi telefon cinîya xo reyde qisey kerd û dîyar kerd ke badê ke embazê înan Pamayî çalakîya fedaî pê ardo rayîrberê zîndanî ê û sewbîna embazêk ê kerdî qawişê DAIŞîyan. Kalinî da zanayene ke qawişê DAIŞîyan de înan tehdît kenî, heqaret bi înan kenî û cok ra ti asayîşê înan çin o.
Na rewşe ra dima birayê Kalinî, Kiyas Kalinî muracatê Merkezê Pêroyî yê Komeleya Heqê Merdiman (ÎHD) kerd. Kiyas Kalinî ard ziwan kw birayê ci 1ê Adare ra nata grevê vêşanîye de yo û wina domna: “Ma derheqê weşî û cuya ci ra endîşeyin î. Ma zanê welat bi çîyêko sey edalet çin o. Reya zî hende bêhuqûqî nêbeno. Ma na rewşe qebûl nêkenî. Êdî hewnê ma nîno. Ganî birayê mi û embazê birayê mi bil ez qawişê DAIŞîyan ra bêrî vetene. Ma veng danê heme komeleyanê merdimîye ke verê ke çîyêko xirab biqewimîyo destê kamî ra çi yeno wa bikerî.” XARPÊT
