Malbatên ku çalakiya wan a li ber girtîgehê tê astengkirin bi cîgirê waliyê Kocaeliyê re hevdîtin pêk anîn û daxwazên xwe jê re ragihandin. Malbatan diyar kir ku cîgirê walî ji wan re gotiye ku çalakiya wan bi fermana WezarataKarên Hundir tê astengkirin
Çalakiya nobetê ya malbatên ku zarokên wan ji bo rakirina tecrîda li ser Rêberê Gelê Kurd Abdullah Ocalan di greva birçîbûnê de ne, didome. Malbatan roja 9’ê mehê li ber derê Girtîgeha Tîpa M a Gebzeyê dest bi çalakiyê kir. Îro di roja 4’an de dema ku malbat careke din xwestin biçin ber derê girtîgehê û dest bi çalakiya xwe bikin, ji aliyê polîsan ve hatin astengkirin. Polîsan bi hinceta ku walîtiyê qedexe kiriye destûr neda ku malbat derbasî ber derê girtîgehê bibin.
Li ser vê yekê malbat derbasî kafeyekê bûn. Polîsan kafeyê jî dorpêç kir û xwest ku malbat ji kafeyê derên û dûr bikevin. Malbatan vê helwesta polîsan bi dûrişmeyan şermezar kir û bi parlamenterê HDP’ê yê Stenbolê Erol Katircioglû re derbasî Walîtiya Kocaeliyê bûn û xwestin bi walî re hevdîtin pêk bînin. Ji ber ku walî ne li walîtiyê bû cîgirê wî bi malbatan re hevdîtin pêk anî. Malbatan ragihand ku cîgirê walî ji wan re gotiye ku ku bi fermana Wezarata Karên Hundir tên astengkirin.
Piştî hevdîtinê malbat ji bînaya walîtiyê veqetiyan û diyar kirin ku dê sibê careke din biçin der derê girtîgehê û çalakiya xwe bidomînin. Malbat dema ku ji bînayê veqetiyan dûrişmeya ‘Bijî Berxwedana Zindana’ berz kirin. Hat ragihandin ku malbatan di hevdîtinê de ji cîgirê walî xwestine ku nêzî girtîgehê ji wan re cihek bê eyarkirin û çalakiya xwe li vêderê bidomînin. Lê cîgirê walî vê daxwaza malbatan red kiriye û diyar kiriye ku nikarin destûra vê yekê bidin. KOCAELÎ
