Govend û şahiyên gelê kurd heya roja meya îro jî hebûna xwe parastîne. Lê her ku diçe hêjmara komên govendê kêm dibe. Endamên koma govenda Estêrk bang li hemû jinan kirin daku çand û govenda kurdî biparêzin
Koma Govendê ya Estêrkan (stêrk) ku ji 20 jin û zilamekê pêkhatiye di sala 2006’an de li bajarê Silêmaniyê hatiye damezirandin. Heya niha gelek caran bi govend û stranên kurdî beşdarî şahiyên taybet yê Herêma Federal a Kurdistanê bûne.
Endamên Koma Govenda Estêrkan bi rêya Rojnewsê bang li tevahî jinan kir ku xwedî li çand û govendên kurdî derkevin. Sena Cemal diyar kir ku her ku diçe govendên kurdî ber bi tûnebûnê ve diçin û wiha got: “Ez daxwaz ji keç û xortên kurdan dikim ku xwedî li çand, hûner û govendên xwe derkevin. Ji ber ku govend û stran çanda bav û bapîrên me ne. Ez hêvî dikim ku çanda me her zindî bimîne.”
Endama komê Giznig Omer bang li tevahî jinên kurd kir ku xwedî li hûner, govend û çanda kurdî derkevin û wiha axivî: “Ev çend sale ez di koma govendê ya Estêrk deme, dayika min gelek bi min re bû alîkar ji bo ku ez beşdarî koma govendê bibim. Ji bo wê pêwîste jin bi heskirina xwe derkevin qadan û xwedî li hûnera kurdî derkevin.”
Giznig Omer bang li dayîk û bavan kirin ku rê li ber keçên xwe vekin û bi wanre bibin alikar ji bo çand û govendên kurdî zindî bimînin û biparêzin. SILÊMANÎ
