Xoverdayîşê grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvene roja 158. de, yê pêroyê zindanan roja 120. de, yê Nasir Yagizî roja 145. de, yê 14 çalakgeranê Strasbourgî roja 119. de, yê Fadîle Toke roja 85. de, yê Sebahat Tuncel û Selma Irmake roja 89. de, yê Yusuf Îba roja 92. de û yê Sedat Akinî roja 88. de dewam keno
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 158. de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena. Sewbîna 16ê Kanûne de zindananê Tirkîye de zî çalakîya grevê vêşanîye dest pêkerdbî û 1ê Adare de zî vilayê pêroyê zindanan bîye.
Sewbîna çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 145. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 119. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 317 hepsîyan ra zêde dest pêkerdbî zî roja 120. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.
Endama Meclîsê Îştarî Fadîle Toke roja 85. de ya. Hemsereka DBPyî ya verê Sebahat Tuncel û ya parlamentera HDPyî ya verê Selma Irmake ke zindan de dayê destpêkerdiş roja 89. de yê û bajarê Toronto ê Kanadayî de zî çalakîya Yusuf Îba ke dayo destpêkerdene roja 90. de dewam keno.
Awanîya HDPyî bajarî de çalakîya grevê vêşanîye ya parlamenteran dewam kena. Çalakîya ke parlamentera HDPyî Dêrsim Dag 3ê Adare de da destpêkerdene û Parlamenterê Wanî Tayîp Temel û Murat Sarisaç ke 8ê Adare de dest pêkerdî zî dewam kenê.
Nê hepsîyan ra yew zî Sedat Akinî yo. Akino ke Zindanê Tîpa Eyî yê Erzinganî de seba wedarnayîşê tecrîdê serê Rayberê PKKyî Abdullah Ocalanî kewt grevê vêşanîye û badê ke 19ê Sibate de serbest ame veradayene keyeyê xo yê qezaya Dêrikî ya Mêrdînî de çalakîya xo roja 88. de dewan keno. Ganî bêro vîrvistiş ke rewşa weşîya çalakgeran her ke şona xidar bena. AMED
