Hevşaredarên Bajarê Mezin ên Mêrdînê yên HDP’î Ahmet Turk û Figen Altındag piştî 15 rojan mazbata xwe girtin. Turk diyar kir ku dê herî zêde girîngiyê bidin zelaliyê
Hevşaredarên Bajarê Mezin ê Mêrdînê yên HDP’î Ahmet Turk û Figen Altindag, mazbataya xwe girtin. Hevşaredar Turk û Altindag ji bo mazbata xwe bigirin çûn Lijneya Hilbijartinê ya Mêrdînê. Li gel hevşaredaran Parlamentera HDP’ê ya Mêrdînê Ebrû Gunay, endam û rêveberên HDP’ê jî hevkarî kirin. Turk, piştî mazbata xwe girt axivî û spasiyên xwe ji bo hemû gelê Mêrdînê kir. Turk li vir wiha got: “Şaredarî cihê xizmetê ye. Ji bo em bi awayekî herî xweşik xizmeta gel bikin em ê bi hemû hêza xwe bixebitnin. Em ê her kar û barê xwe bi awayekî pir zelal bi gelê xwe re parve bikin. Em ê bi kelecanek mezin xizmeta gelê xwe bikin. Ji bo demokratîkbûna vî welatî bibe mayinde em ê xizmetê bikin.”
Turk bal kişand ser çalakiyen greva birçibûnê yên li dijî tecrîdkirina Rêberê Gelê Kurd Abdullah Ocalan jî û wiha got: “Îro em di pêvajoyek pir zor de derbas dibin. Bi sedan kesan li dijî tecrîdê û ji bo pêşerojeke demokratîk bedena xwe daye ber mirinê. Ez li vir bang li Serokomar, Wezîrê Dadê û gelê me dikim. Em destûr nedin ku mirovên me jiyana xwe ji dest bidin. Em naxwazin kes bimire. Ji bo kes nemire divê em tev di nava hewldanan de bin. Em dizanin îro diştek di şaredariyê de nemaye. Li gel ve yekê em ê xebatên xwe bi gelê xwe re berdewam bikin.”
Hevşaredar Fîgen Altindag jî ji bo piştgiriya gel spasiyên xwe ji gelê Mêrdînê re anî ziman. MÊRDÎN
