Hemserekê Şaredarîya Bajarê Girdî yê HDPyî yê Amedî Adnan Selçuk Mizrakli û Hulya Alokmen Uyanike Dezgeyê Weçînayîşî yê Bajarî ra mazbataya xo girewtî
Hemserekê Şaredarîya Bajarê Girdî yê Partîya Demokratîke ya Şaran (HDP) yê Amedî Adnan Selçuk Mizrakli û Hulya Alokmen Uyanike Dezgeyê Weçînayîşî yê Bajarî ra mazbataya xo girewtî. Badê ke hemserekî mazbataya xo girewtî, tewrê parlamenter û rayîrberê HDPyî kişta Edlîyeya Amedî de eşkerayîya çapemenî dayî.
Mizrakliyî ewja de qiseykerdişêko kilm kerd û va: “Her çiqas ke erê bibo zî ma mazbatay xo girewt. Badê rejîmê qayûmî, şar roja yewin de mazbata da ma. Nika ma binê varanî de eşkerayî danî. Wa çilka varano ke serê ma de vareno bibo aştîye. Ma roja ewil mazbataya xo şarî ra girewt. Ewro 160 rojî yo ke Leyla Guvene hemverê tecrîdî de grevê vêşanîye de ya. Bi hezaran hepsîyî zîndanan de grevê vêşanîye de yî. Wa omid kenî ke waştişê înan rayîrê aştîye akero. Tecrîd teberê merdimîye û huqûqî yo. Ma omid kenî ke êdî proses bibo destpêka aştîya daîmî.” AMED
