Sînan Çelîko ke Zîndanê Riha de grevê vêşanîye de yo dîyar kerd ke vindetişê selahîyetdarê zîndanî yê hemverê çalakgeran vindetişêko merdimîye û ehlaqî nîyo û doktorê ke yenî kontrol zî bi hawayo polîtîk têgêrenî
Hepsîyê ke Zîndanê T-1î yê Riha de seba wedarnayîşê tecrîdê serê Rayberê PKKyî Abdullah Ocalanî grevê vêşanîye de yî ra yew zî Sînan Çelîkî yo. Çelîko 25 serrî 5ê Çeleyî de kewt grevê vêşanîye. Dayîka Çelîkî Şohret Çelîke dîyar kerde keêdî lajê aye nêeşkeno telefon de daxî qisey bikero û bale nate rewşa weşîya çalakgeran ser.
Çelîke destpêkê qiseykerdişê xo de qala qiseykerdişo ke tewr peynî lajê xo reyde kerda kerde û daye zanayene ke lajê aye wina vato: “Vindetişê selahîyetdarê zîndanî yê hemverê çalakgeran vindetişêko merdimîye û ehlaqî nîyo. Roja ke ma dest bi çalakîya vêşanîye kerda ra heta ewro kontrolê ma yê weşî bi hawayo biserûber nêameya kerdene. vîtamînê ke yenî dayene kêmî yî. Vindetiş û nizdîbîyayîşê doktorê wezîfedarî zî goreyê etîkê weşî nîyî. Seba kontrolkerdişî ge-ge yenî, la wexto ke yenî zî polîtîk têgêrenî. Êdî weşîya mi zî baş nîya. Ez zihîf bîya. La heta ke waştişê ma nêrî qebûlkerdene, ez fek çalakîya xo ra vera nêdana.”
Dayîk Çelîke tewr peynî veng daye û wina qedênaye: “Ez veng dana Erdoganî; 106 rojî yo ke Sînan grevê vêşanîye de yo. Domanê to zî estî. herinda ke ti paweyê mergê domananê ma vinderî, gamêk bierz. Goş bide qerayîşê dayîkan û bi hawayo lez tecrîdî wedarne. Ka DMME? Ma vengê dayîkan nêeşnaweno?” ERZIROM
