RSF’ê têkildarî rewşa rojnamegeriyê ya li 180 welatan raporek parve kir. RSF’ê da zanîn ku ji nava 180 welatan tenê 24 welat dikare weke ‘baş’ an jî ‘baştir’ bê nîşandan. RSF’ê ji bo dewleta tirk jî pênaseya ‘Tirkiye ji bo rojnamegeran bûye girtîgeha herî mezin’ kir
Rêxistina Rojnamegerên Sînornenas (RSF) ku navenda wê li paytexta Fransayê Parîsê ye, bi ser navê ‘mekanîka tirsê’, kategoriya azadiya çapemeniyê ya global weşand.
Di raporê de RSF’ê destnîşan kir ku welatên bi ewle yên ku rojnameger bikarin karê xwe bi rehetî lê bikin her ku diçe kêmtir dibin. RSF’ê diyar kir ku rejîmên otorîter serdestiya xwe ya li ser medyayê her ku diçe xurtir dikin.
Di rapora RSF’ê de 180 welat hatine destgirtin. Li gorî rapora RSF’ê, ji bo rojnamegeran welatê herî bi ewle Norweç e û yê herî ne bi ewle jî Tirkmenistan e. Di raporê de tê diyarkirin ku li Rûsya, Venezûela û Çînê jî bi çend pîleyan rewş nebaştir bûye. RSF’ê da zanîn ku di nava 180 welatan de tenê 24 welat dikare weke ‘baş’ an jî ‘baştir’ bê nîşandan. Sala borî ev hejmar 26 bû.
Rapora dewleta tirk
RSF di rapora xwe de rewşa rojnamegeriyê ya li dewleta tirk jî vedibêje. RSF dibêje ku rewşa li Tirkiyeyê xerabtir bûye û ev agahî parve kirin: “Êrîşên li Tirkiyeyê di 20 salan de zêdetir bûn. Piştî hewldana darbeya 15’ê tîrmeha sala 2016’an, zextên li ser medyayê zêde bûn. Tirkiye ji bo rojnamegeran bûye girtîgeha herî mezin. Bûye tiştekî normal ku mirov beriya ku werin darizandin salekê di girtîgehê de bimînin. Sansura li ser înternet û tora civakî jî hatiye asteke nû. Rayedar êdî hewl didin servîsên dîmenan ên di înternetê de jî kontrol bikin.” PARÎS
