Verdewamkerdişê kampanyaya weçînayîşî û dimayê weçînayîşî de roc bi roc ma vatişêke rayedaranê na desthilatî ke vatişê înan vatişê heme dîktator û derbekaran derbas kenê rê bî şahid û benê şahid. Nê rayedarê desthilatî hemverê grevê veyşanî ke semedê wedartişê tecrîdî hepisxananê înan de û teberê hepisxanan de panc aşmî ra zêde yo domêno kerr û korîya xo domnenê la semedo ke şaredarîyêke (bi dek û dolaban) bifînê xo dest barre barre înan goşanê ma zingnena. Desthilatîya dagirker e ke nê çend serrê peyînan de dîktatorî zî ro kîtabê xo zêdnawa hemverê Rayverê PKKî bêhiqûqî û bêqanûnîya xo hema zî domnena. Bi qasê şarê Kurdî, şarê Tirkîye û heme rayedarê hikûmatî zî baş zanê ke tecrîdo ke yeno verdewamkerdişî hiqûq û qanûnanê dewlete de ca nêgîno û no tecrîd teberê qanûnan de yo, binpêkerdişê heq û hiqûqê merdimahî yo. La çîyêke ecêb o ke bi serran o yeno domnayîşî û hem rayedarê hikûmatî, hem şarê Tirkîye hem jî dewletê bînî yê dinya sey ke bêhiqûqîyêka newîne nîna kerdişî tê geyrenê.
Roc bi roc bedenî helênê la na desthilatî sankî teberê weçînayîşî de ti problemêke çinêbo tê geyrena û rayîrê bidestvistişê çend şaredarîyan de heq û hiqûqê merdimahî bin ling kena heta rayîrê desthilatîya xo de heme qayde nêrayîrîyan mubah vînena.
Nê weçînayîşî de zî çend qeza û şaristanê Kurdan de dek û dolabê xo bi ca ardî. Eke bêro ma vîr wezîrê înan ê zerrî û serokê partîya înan eşkera vatêne, ‘eke şaredarî weçînayîş de bi ser bikoyê zî ma go bi înan wezîfe nêdê kerdişî’ û ma dî ke YSKyî senîn emrê înan bi ca ard. Mezbate nêda namzedanê HDPî ke mexdûrê KHKî yê û bi îradeyê şarî ameyê weçînayîşî la dayî AKPyîcanê ke nêameyê weçînayîşî. Esasê xo de na desthilatîya faşîst û dîktatore dimayê weçînayîşî rengê xo yê faşîzm û dîktatorî baştir moşt ra. Îzahatê hetkarê serekê pêroyî yê AKPî Yavûzî yo ke vano hemwelatîyê ke KHK ra ameyê eştişî wa nêeşkê raye xo zî bixebetnê, wa nêrê weçînayîşî û nêeşkê weçînê, rayîro ke na desthilatî tede ya baş dano ramoştişî. Helbet bi qaso ke vatişê trajîkî hetê înan ra ameyî vatişî û pratîk de ameyî bicaardişî vatiş û hewldayîşê înan ê trajîkomîkî zî kewtî rojev. Etya hedefê înan şaredarîya Mêrdînî bî û sebeb zî extîyarî û nêweşîya Şaredar Ehmed Turkî bî (!) Erê Welleh eynî wina! AKPî serre ro YSKyê xo da û va Ehmed Turk extîyar û nêweş o ay ra sebeb MEZBATE bidê MA! Herhalde Yildirimê înan o ke kerdib namzedê şaristanêke gird ê sey Stenbolî xortêke vîst serre bi hayey ma çinêbî loma emrê şaredarê Kurdan înan rê sey problemî (yanê bi awayê înan sey nîmetêke ke dest bidê îradeyê şarê ma ser) eysabi.
Helbet vernîya weçînayîş û dimayê weçînayîşî pîya de hetê rayedaranê na desthilatî ra dozê nefretê hemverê şarê Kurdî vecya kerta tewr cor e. Heta raştîya ke sebebê krîzê ekonomî sîleh û guleyê ke hemverê şarê Kurdî yenê xebetnayîşî yê hetê serekê AKPî Erdoganî bi xo ra hem zî sey ke çiyêke zehf normal eşkera bikero raya pêroyî rê da zanayîşî. Yanê va, ma semedê kiştişê şarê Kurdî gule û sîlehan xebetnenê nê awayî ra rewşê ekonomîya ma bîyo xera. Bi nê vatişê xo waşt ke kiştişê şarê Kurdî meşrû bimojno ra. Nê rocê peyînan de hetê hêzanê na desthilatî ra bi sîleh û guleyanê înan bi awayêke înfazî kiştiş ewladê Kurdan Receb Hantaşî û hetê walîtîye na desthilatî ra hewldayîşê meşrûkerdişê kiştişê ewladê Kurdan mîsalo tewr peyîn ê fikrê na desthilatî yo. Na desthilatîya ke tecrîd û kiştişê şarê Kurdî xo rê kerdo wezîfe bi vatişanê xo zî dîktatorî û faşîzmê xo mojnena ra.
