Ji ber afîşên li ser ‘Azadî bi xwerêvêbirinê dest pê dike’ nivîsandî wek ‘Azadî bi xwerêveberiyê dest pê dike, azadî bi xweseriyê dest pê dike’ hatine wergerandin, der barê hevseroka HDP’ê ya navçeyê Guler Tûnç û parêzer Gulşen Elçî de doz hat vekirin
Li navçeya Cizîrê ya Şirnexê, beriya hilbijartina herêmî ya 31’ê adarê HDP’a navçeyê li gelek deverên navçeyê afîşên li ser ‘Azadî bi xwerêvebirinê dest pê dike’ nivîsandî li bîlbordan hatibûn daliqandin. Piştî afîş hatin daliqandin, demildest hatibûn rakirin û ji bo vê îfadeya hevseroka HDP’a Cizîrê Guler Tûnç û peywirdara HDP’ê ya li Desteya Hilbijartinê ya Navçeyê parêzer Gulşen Elçî hatibû girtin.
Dozgeriya Komarê ya Cizîrê der barê her du kesan de îdianame amade kir. Îdianame bi îdiaya ‘Pesindana sûc û sûcdar’ hat amadekirin û ji aliyê Dadgeha Cezayê Asliye ya 2’yan a Cizîrê ve hat qebûlkirin. Wê danişîna ewil a dozê di 13’yê hezîranê de pêk bê.
Di îdianameyê de wergera şaş a afîşan hat destnîşankirin. Wergera tirkî ya nivîsa li ser afîşan ‘Azadî bi xwerêvêbirinê dest pê dike’ bi şaşî wek ‘Azadî bi xwerêveberiyê dest pê dike, azadî bi xweseriyê dest pê dike’ (Ozgurluk ozyonetimle başlar, ozgurluk ozerklikle başlar) hatiye wergerandin. Ji ber vê bi îdiaya ‘pesindana sûcê ku dixwaze yekitî û yekpareyiya dewletê xirab bike’ îdianame hat amadekirin. ŞIRNEX
