Roja Rojnamegeriya Kurdî li hemû rojnamegeran pîroz be! Rêwîtiya Çapemeniya Azad a ragihandina rastiyan li dijî hemû êrîş û astengiyan dewam dike
Rojnameya Kurdistanê 22’ê nîsana 1898’an de li Kahîreya Misirê dest bi weşanê kir û her sal 22’ê nîsanê wekî Roja Rojnamegeriya Kurdî tê pîrozkirin. Sibê Roja Rojnamegeriya Kurdî ye û wekî e-rojname em vê rojê li hemû rojnamegerên kurd pîroz dikin.
Rojnameya Kurdistanê 121 sal berê ji aliyê Mîkdat Mîthat Bedirxan ve hat derxistin û destpêka weşana vê rojnameyê di dîroka çapemeniya kurd de wekî mîladekê tê pênasekirin. Nemaze jî li hemberî pişaftinê û ji bo parastina zimanê kurdî ev gaveke girîng e.
Çapemeniya Azad ji bo rastiyan bigihînin gel heta niha berdêlên pir giran da û hê jî berdêlan didin. Di vê oxirê de û rêwîtiya heqîqetê de heta niha bi dehan rojnameger tevli karvanên şehîdan bûn. Pênûsa Apê Mûsa û şêhîdên çapemeniyê tu caran li erdê nema û îro bi sedan rojnameger li çar parçeyên Kurdistanê û gelek deverên cîhanê têkoşîna ragihandina heqîqetê didomînin.
Desthilatdar û dagirkerên Kurdistanê ji bo rastî negihêjin gel her tiştî dikin. Di serdema hikûmetên AKP’ê de bi sedan rojnamegerên kurd hatin girtin û îro jî gelek hevalên me rojnameger di zindanan de li ber xwe didin.
Em careke din dibêjin Roja Rojnamegeriya Kurdî li me hemûya pîroz be!
