Piştî ku Wezîrê Karê Hundir Suleyman Soylu hedef nîşan da li Enqereyê Serokê Giştî yê CHP’ê Kemal Kiliçdaroglu rastî êrîşê hat. Walîtiya Enqereyê êrîş wekî ‘çalakiya protestoyê’ bi nav kir
Li navçeya Çelê ya Colemêrgê di encama çalakiya gerîlayên HPG’ê de 12 leşkerên artêşa tirk hatibûn kuştin. Serokê Giştî yê CHP’ê Kemal Kiliçdaroglu li navçeya Çubuk ya Enqereyê dema beşdarî merasîma cenazeyê leşkerê tirk Yener Kirikçi bû rastî êrîşa komekê hat.
Leşker û parêzvanan Kiliçdaroglu birin malekê û komê dora malê girtin û xwestin Kiliçdaroglu lînç bikin. Hinek kesan kevir avêtin malê û şibakên malê şikandin. Kiliçdaroglu diyar kir ku ev êrîşeke plankirî ye û kesên ku ew kom anînê vê derê diyar in û dê hesabê vê êrîşê bipirse.
Walîtîya Enqereyê têkildarî bûyerê daxuyanî da û êrîş wekî ‘çalakiya protestoyê’ bi nav kir.
Wezîrê Karê Hundir yê Tirkiyeyê Suleyman Soylu di axaftineke xwe de gotibû dê li vir wiha nehêlin CHP’î beşdarî merasîma leşkerên tirk bibin û her wiha talîmat daye ku polîsan ku di protokolê de ji bo CHP’iyan cih neyê veqetandin. ENQERE
