Fermandariya Biryargeha Navenda NPG’ê bi daxuyaniyekê çalakiya gerîlayên HPG’ê ya di 19’ê nîsanê de li Çelê li dijî artêşa tirk pêk anîn, pîroz kir
Fermandariya Biryargeha Navenda Parastina Gel (NPG) çalakiya gerîlayan a di 19’ê nîsanê de li dijî hêzên artêşa tirk ên li Girê Koordîneyê ya Qada Zapê pîroz kir. Fermandariya Biryargeha Navenda NPG’ê di peyama pîrozbahiyê de diyar kir ku gerîlayan di 19’ê nîsanê de çalakiyeke serkeftî li dar xistine.
Fermandariyê çalakiya gerîlayan pîroz kir û ev tişt parve kirin: “Ev çalakî li hemberî faşîzma ku li kuçe û kolanan êrîşî dayikên me dike, bûye bersiv. Fermandar û şervanên ku keda wan di vê çalakiyê de hene, em hemûyan silav dikin. Di vê çalakiyê de tiştek bi hêzên gerîlayan nehatiye û derbeke giran li dijmin hatiye xistin. Ev jî diyar dike ku ev çalakî di çarçoveya avakirina nû de hatiye lidarxistin. Bi baweriya ku wê çalakiyên we yên din jî li ser vê xetê bilind bibe, em hemû rêhevalên li qadê silav dikin û serkeftinê ji wan re dixwazin.”
Çalakiya 19’ê nîsanê
Navenda Ragihandin û Çapemeniyê ya HPG’ê di 21’ê nîsanê di roja yekşemê de diyar kiribû ku gerîlayan di 19’ê nîsanê de li Çelê ya Colemêrgê li dijî Girê Koordîneyê çalakiyek li dar xistine û di vê çalakiyê de fermandarê gir jî di nav de herî kêm 12 leşker hatine kuştin. HPG’ê gotibû ku gerîlayan ji du milan ve li hêzên artêşa tirk xistine û ketine gelek çeperên leşkeran. HPG’ê diyar kiribû ku bi qasî ku hatiye tespîtkirin 12 leşker hatine kuştin, 10 leşker birîndar bûne, aqûbeta 3 leşkeran ne diyar e û 3 bataryayên obusan jî hatine îmhakirin.
HPG’ê destnîşan kiribû ku di heman demê de hêzên wan li yekîneyên artêşa tirk a li Girê Koordîneyê, Girê Şehîd Zekî û Girê Petrotê jî dane lê encamên çalakiya wan nehatiye zelalkirin. BEHDÎNAN
