Malbatên girtiyan xwestin li ber Girtîgeha Êlihê çalakiya rûniştinê li dar bixin. Polîsan mudaxeleyê çalakiyê kir û herî kêm 20 kes binçav kirin
Malbatên girtiyên li dijî tecrîdkirina Rêberê Gelê Kurd Abdullah Ocalan di greva birçîbûnê de ne xwetin li ber Girtîgeha Tîpa M a Êlihê daxuyanî bidin çapemeniyê û çalakiya rûniştinê li dar bixin. Polîsan mudaxeleyî çalakiya malbatan kirin. Di mudaxeleyê de herî kêm 20 kes hatin binçavkirin.
Parlamentera HDP’ê ya Êlihê Ayşe Acar Başaran û gelek kes beşdarî çalakiya malbatên berxwedêrên greva birçîbûnê bûn. Polîsan gotin ku bi hinceta çalakiya malbatan derqanûnî ye dê mudaxale bikin. Parlamenter Başaran bi polîsan re hevdîtin pêk anî û diyar kir ku dayik ji bo piştgiriyê bidin greva birçîbûnê çalakiyê li dar dixin û ev çalakî ji bo hemû kesî ye.
Piştre polîsan êrîşî dayikan kirin û herî kêm 20 kes hatin binçavkirin. Navê kesên ku hatin binçavkirin wiha ne; Hîdayet Tîryakî, Şukran Sîncar, Mîsal Tosun, Sultan Azboy, Sabîha Ekîncî, Sedef Ozdemîr, Suphiye Dogan, Emîne Ugur, Kasîde Levent, Nurhan Zeyrek, Hamîde Buyuktop, Fatîme Yîgîtalp, Vasîfe Bal û kesên bi navê Saadet û Mizbet ku paşnavê wan nehat hînbûn.
Di êrîşa tund a polîsan de laçikên hinek dayikan ketin erdê û nehiştin dayik laçikên xwe ji erdê rakin. Dayikeke ku dema hat binçavkirin zarokê xwe yê 14 salî nîşan da û got ku di destê min de tenê ev maye û ev vî jî nadim we.
Her wiha xebatkara çapemeniya HDP’ê Sedef Ozdemîr ku mudaxaleya polîsan qeyd dikir jî hat binçavkirin. ÊLIH
