Mazhar Guler ê 54 roj in li dijî tecrîdê di greva birçîbûnê de ye bi rêya malbata xwe ragihand ku rewşa du hevalên wan ên di çalakiyê de ne giran bûye
Çalakiya greva birçîbûnê ya bêdem û bêdorveger a bi hezaran a girtiyan li dijî tecrîdkirina Rêberê Gelê Kurd Abdullah Ocalan didome. Yek ji van girtiyên 54 roj in di greve de ye Mazhar Guler. Guler ku di Girtîgeha Tîpa F a Kurkçulerê ya Edeneyê di greve de ye bi rêya malbata xwe ji raya giştî re peyam şand.
Guler diyar kir ku her çiqas zextên derûnî li ser wan bê kirin jî dê biryardarî çalakiya xwe dewam bikin û ev peyam parve kir: “Em 15 heval di greva birçîbûnê de ne. Înan Akin ê 3 meh in di greva birçîbûnê de ye û Harun Kaya ê 54 roj in di greva birçîbûnê de rewşa wan gihîştiye astek xeterdar. Vîtamînan têr nadin me. Ji ber girtiyên FETO û DAIŞ’î di heman korîdorê de ne em nikarin derkevin hevdîtinên vekirî. Gardiyan her roj 3 caran bi şîşan li deriyan didin. Bi vî awayî zextên derûnî li ser me dikin. Heta tecrîd neyê rakirin dê çalakiya me dewam bike. Heta daxwaza me were cih wê berxwedana me berdewam bike.” EDENE
