Parlamenterê HDPyî yê Çewlîgî Erdal Aydemîrî merdişê maseyanê Awa Perî yê ke rîyê Awbendê Pembelîkî ra mirenê, kirişt meclîsî
Parlamenterê Partîya Demokratîke ya Şaran (HDP) yê Çewlîgî Erdal Aydemîrî wezîrê Derûdor û Bajarawanîye Mûrat Kûrûmî ra waşt ke derheqê merdişê maseyanê Awa Perî yê ke rîyê Awbendê Pembelîkî ra mirenê de cewabê persanê ci bido.
Aydemîrî bale ante merdişê maseyanê Awa Perî ser û va: “Goreyê zanayîşê ke dewijan dayê, Awbendê Pembelikî yo ke mabanê sînoranê Xarpêt, Dêrsim û Çewlîgî de yo nê hewteyanê peyênan de merdişê maseyan û awe ser o vilabîyayîşê înan yeno dîyayene. Merdişê nê maseyan tewr zêde dewa Akkuşî ya ya Depî yê Xarpêtî, dewa Doluca Cêrî ya Qisle ya Dêrsim û dewa Çayagzi ya Xorxolî yê Çewlîgî de yenê dîyayene. Rîyê merdişê maseyan ra şarê herême qesawet keno. Ganî derheqê naye de cigêrayîşêk bêro kerdene, sebebê merdişê maseyan bêro eşkerakerdene û tedbîrê ci berê girewtene. Eke vernîya naye mero girewtene problemê hîna girdî vejîyenê.”
Aydemîri wezîr Kûrûmî ra waşt ke cewabê nê 2 persan bido:
Şima do derheqê merdişê maseyanê Awbendê Pembelîkî dest bikerê cipêrsayîşêk?
Şima do semedê pawitişê maseyan û ganîyanê bînan ê ke awe de yê û semedê weşîya şarî tedbîran bigêrê? ANQARA
