Gerîlayên HPG/YJA Starê li dijî zilm û îşkenceya ku hêzên dewleta tirk li dayikên kurd kirin, çalakî pêk anîn. Li Îdir û Sîdekanê di çalakiyan de 14 leşkerên tirk hatin kuştin
Navenda Ragihandin û Çapemeniyê ya HPG’ê li ser çalakiyên li Îdir û Sîdekanê daxuyaniyeke nivîskî weşand.
HPG’ê diyar kir ku ji bo bersivê bidin êrîşên dewleta tirk ên li hemberî dayikan çalakî lidarxistine û di çalakiya li ser girekî li ber Qereqola Aydinlar a Îdirê de wesayîteke leşkerî xistine kemîne, 11 leşker hatine kuştin û 10 leşker jî birîndar bûne. HPG’ê da zanîn ku di vê çalakiyê de tu windahiyên wan çênebûne.
Li Sidekanê 3 leşker hatin kuştin
HPG’ê destnîşan kir ku di çarçoveya Pêngava Şoreşgerî ya Şehîd Bager û Şehîd Ronya de di 24’ê nîsanê piştî nîvro saet 14:00 de gerîlayan li ser Girê Kevortê yê li bajarokê Sîdekanê yê Başûrê Kurdistanê çalakiyek pêk anîn. Di vê çalakiyê de 3 leşkerên tik hatine kuştin û 2 leşker jî birîndar bûne. Piştî çalakiyê gir ji aliyê balafirên şer ên dewleta tirk ve hatiye bombebarankirin û di êrîşa hewayî de tu zirar negihiştiye hêzên gerîla.
Her wiha HPG’ê ragihand ku di êrîşên hewayî yên Garê û Avaşînê de windahiyên gerîla nîne û xisara madî gihîştiye bax û baxçeyên gundê Gisê. BEHDÎNAN
