Parlamenterê HDPyî Mûrat Sarisaçî ard ziwan ke AKP bi tecrîd û polîtîkaya dişmenîye ya Kurdan wazeno payra bimano û va: “Tecrît vera şarê Kurdî û hêzanê demokrasîyî yeno caardene.”
Xoverdayîşê grevê vêşanîye yo ke semedê wedartişê tecrîdê serê Rayberê Şarê Kurdî Abdullah Ocalanî rayberîya Leyla Guvene de ame destpêkerdene bi qerardarîya girde dewam keno. Leyla Guvene 170, Hewlêr de Nasir Yagiz 157, xoverdayoxê Strasbourgî û Galller de Îmam Şîş 131, zîndananê Kurdistan û Tirkîya de xoverdayoxê ke grûbanê verênan de yê 132 rojî yo grevê vêşanîye de yê bêdem-bêagêrayîşî de yê.
Parlamenterê Partîya Demokratîke ya Şaran (HDP) Dersîm Dage 3 û Tayyîp Temel û Mûrat Sarisaçî zî 8ê Adare de dest bi grevê vêşanîye kerd. Parlamenterê HDPyî yê Wanî Mûrat Sarisaçî tecrîdê serê Rayberê Şarê Kurdî Abdullah Ocalanî û grevê vêşanîye ercnayî.
Mûrat Sarisaçî ard ziwan ke AKP bi tecrîd û polîtîkaya dişmenîye ya Kurdan wazeno payra bimano û va: “Tecrît vera şarê Kurdî û hêzanê demokrasîyî yeno caardene. Kurdî û Rayberê înan sey hedef ameyî ramojanyene û şer hîna ame xorîkerdene. Dewlete Îmrali de sîstemo taybet nayo ro. Tecrîd çend xorî beno tewirê dewlete yê vera Kurdan zî bedilyeno, tepiştiş, merg û qirkerişî yenê ciwîyayene. Semedê qedînayîşê nê demî ganî tecrîd bêro wedartene û vera Kurdan xorexnekerdiş bêro dayene.”
CPT raybazanê xo ra dûrî kewto
Sarisaçî vera bêvengîya Komîteya Vernîgirewtişê Îşkenceyan ya Ewropa (CPT) reaksîyon da û wina dewam kerd: “CPT heta ewro vera bêhuqûqîya Îmraliyî vengê xo nêvet. CPT û MHME bi tewir û qeraranê xo peyê xo kerd Kurdan. Tecrîd tena bi destê Tirkîya nêbeno. Tena rolê gardîyanîye dîyayo Tirkîya. Tepiştişê Ocalanî ra heta sîstemê Îmraliyî her çî binê kontrolê hêzanê serdestan de yo. CPT zî bîyo leteyêkê na polîtîka. Zulm û şerê vera şarê Kurdî zî pabesteyê na polîtîka yê. Îşxalê Efrînî zî na polîtîka ra xoser nêyo. CPT raybazanê xo ra dûrî kewto.”
Ma do ser bikewî
Sarisaçî vera bêvengîya îqtîdarî ya vera grevê vêşanîye hêrsê xo ard ziwan û qiseykerdişê xo bi nê vatişan qedîna: “Hukmatê AKPyî çarçeweya polîtîkaya şerê vera Kurdan de vera grevê vêşanîye de bêveng o. La şarê Kurdî û merdimê tepişteyan lingan ser o yê û vera faşîzmî xover danê. Ewro reaksîyonêk ehleqî û wîjdanî esto. Ma tena wazenê ke wa dewlete goreyê huqûqî tê bigêro. Her roje bêedaletîye zêdîyena. Ez veng dana şarê Tirkîya, wa vera nêheqîye vengê xo berz bikero. Ewro zulmo ke Kurdan rê yeno kerdene beno ke siba do şima rê bêro kerdene. Vera nê zulmî de bêveng memanê. Ma do ser bikewî.” AMED
