Operasyonê leşkerî ke hirêgoşeyê qezayanê Lîcê, Pasûr û Dara Hênê dest pêkerdbî û pêrodayîş virazîyabî, peynî bî
23ê Nîsane de taxanê Hedik, Xosor, Mezraaliyan, Şaxûr, Karincak, Zengesor û xeylê taxê bînan yê hirêgoşeyê qezayanê Lîcê û Pasûrî yê Amedî û qezaya Dara Hênê ya Çewlîgî de operasyonê leşkerî dîyabî dest pêkerdene. Xeylê leşkerê taybet, polîs û qorîçîyî tewrê oparasyonî bibî.
Heme kewtiş û vejîyayîşê taxan de cayê cigêrayene ameybî ronayene, yewîya leşkerî heme wesayîtanê ke herême ra derbaz bîyêne dayêne vindetene, cigêrayîş ameyêne kerdene û kamîyê hezar û 158 kesan kontrolê GBTyî ra ameyî derbazkerdene.
Ame vatene ke operasyono ke bi piştîya helîkopteran dest pêkerd, 25ê Nîsane de pêrodayîş mabenê leşker û HPGyijan de vejîya. Walîtîya Amedî derheqê operasyonî de eşkerayîyêka nuştekî dabî û vatbî: “Çolderê goma Hevsel û goma Keşkûvarî ya Yalimli de pêrodayîş vejîya û 5 HPGyijî cuya xo vindî kerdî.”
Operasyono ke herêmêko hîra de dîyabî dest pêkerdene vizêr şewe saet 23.00î de peynî bî. AMED
