Ji bo piştgiriya bi çalakiyên greva birçîbûnê re, Platforma Jiyanê Ya Li Dijî Tecrîdê di 23’yê nîsanê de civînek li dar xist û biryara gelek çalakiyan da. Li gorî vê, ji xelekên ji mirovan heta çalakiya rûniştinê û deng derxistinê dê gelek çalakiyên cuda bên lidarxistin
‘Platforma Jiyanê Ya Li Dijî Tecrîdê ya Ewropayê’ di civîna xwe ya sêyemîn de, li dijî bêdengiya li pêşberî grevên birçîbûnê biryara çalakiyan da. Civîn di 23’yê nîsanê de pêk hat. Di civînê de nûnerên KCDK-E, Yaşanacak Dunya, ATÎK, TJK-E, HDP Almanya, SYKP Ewropa, ADHK, SKB, AveG-Kon, AGÎF û HDK Almanyayê amade bûn.
Di civînê de plansaziya dema pêş jî hate amadekirin. Li gorî encamnameya civînê, dê di 29’ê nîsanê de li Kolnê daxuyanî bê dayîn, di 11’ê gulanê de dê bi beşdariya bi sedan kesî li Dusseldorfê xeleka ji mirovan bê girêdan, di her rojên çarşemê de dê li ber Parlamentoya Ewropayê çalakiya rûniştinê bê lidarxistin, di her rojên sêşemê de dê li dijî bêdengiyê çalakiya dengderxistinê bê lidarxistin û li ser grevên birçîbûnê jî dê name bên nivîsandin.
